2023ൽ ഏറ്റവുമധികം കാഴ്ചക്കാരെ ലഭിച്ച ഇന്ത്യൻ സിനിമകളുടെ പേരുകൾ പുറത്തുവിട്ട നെറ്റ്ഫ്ലിക്സ്. ജൂലൈ മുതൽ ഡിസംബർ വരെയുള്ള കാലയളവിലെ കണക്കാണ് പുറത്തുവിട്ടിരിക്കുന്നത്. കരീന കപൂർ പ്രധാന കഥാപാത്രത്തെ അവതരിപ്പിച്ച സുജയ് ഘോഷിന്റെ ക്രൈം ത്രില്ലർ ചിത്രം ജാനേ ജാൻ ആണ് നെറ്റ്ഫ്ലിക്സിൽ ഏറ്റവുമധികം പേർ കണ്ട ഇന്ത്യൻ ചിത്രം.
ലോകമെമ്പാടുമുള്ള 20.2 മില്യൺ കാഴ്ചക്കാരെ ജാനേ ജാൻ സ്വന്തമാക്കി. ആഗോള തലത്തിൽ 83-ാം സ്ഥാനമാണ് ചിത്രത്തിന്. കരീന കപൂറിന്റെ ആദ്യ ഒടിടി ചിത്രം കൂടിയായിരുന്നു ജാനേ ജാൻ. കരീന കൂടാതെ ജയ്ദീപ് അഹ്ലാവത്ത്, വിജയ് വർമ എന്നിവരായിരുന്നു മറ്റ് പ്രധാന കഥാപാത്രങ്ങളായെത്തിയത്. ഗാർഹിക പീഡനത്തെ അതിജീവിച്ച സ്ത്രീയാണ് കരീനയുടെ കഥാപാത്രം. മകളുമായി സ്വസ്ഥമായി ജീവിക്കുന്നതിനിടെ മുൻ ഭർത്താവ് തേടിയെത്തുന്നതും പിന്നീടുണ്ടാകുന്ന സംഭവ വികാസങ്ങളുമാണ് സിനിമ പറയുന്നത്.
ജാനേ ജാനിന് ശേഷം രണ്ടാം സ്ഥാനത്ത് എത്തിയത് ഷാരൂഖ് ഖാൻ ഇരട്ട വേഷത്തിലെത്തിയ അറ്റ്ലി ചിത്രം ജവാൻ ആണ്. നെറ്റ്ഫ്ലിക്സിൽ 16.2 മില്യൺ കാഴ്ചക്കാരെ സിനിമ സ്വന്തമാക്കി. ആഗോളതലത്തിൽ 120-ാം സ്ഥാനമാണ് ജവാന്. മൂന്നാം സ്ഥാനത്ത് വിശാൽ ഭരദ്വാജിന്റെ സ്പൈ ത്രില്ലർ ഖൂഫിയ എത്തി. തബു, അലി ഫാസൽ, വാമിയ ഗബ്ബി എന്നിവർ പ്രധാന കഥാപാത്രങ്ങളായെത്തിയ ചിത്രം 12.1 മില്യാൺ കാഴ്ചക്കാരെ നേടി. ആഗോളതലത്തിൽ 194-ാമതാണ് ഖൂഫിയയുടെ സ്ഥാനമെന്നും നെറ്റ്ഫ്ലിക്സ് ഇന്ത്യ അറിയിച്ചു.
ഇവ കൂടാതെ OMG 2, ലസ്റ്റ് സ്റ്റോറീസ് 2, ഡ്രീം ഗേൾ 2 എന്നിവയും പട്ടികയിൽ ഇടംപിടിച്ചു. ഏറ്റവുമധികം പേർ കണ്ട ഇന്ത്യൻ സീരീസ് റെയിൽവേ മെൻ ആണ്. ഭോപ്പാൽ വിഷവാതക ദുരന്തത്തെ ആസ്പദമാക്കി ചിത്രീകരിച്ച പരമ്പരയാണ് റെയിൽവേ മെൻ.
