രവീഷ് നാഥിന്റെ സംവിധാനത്തിലൊരുങ്ങുന്ന ചിത്രമായ സമാധാന പുസ്തകത്തിന്റെ ഫസ്റ്റ്ലുക്ക് പോസ്റ്റർ പുറത്ത്. ഉണ്ണി മുകുന്ദൻ, സുരേഷ് ഗോപി, ദിലീപ് എന്നിവരുടെ ഫെയ്സ്ബുക്ക് പേജിലൂടെയാണ് ഫസ്റ്റ്ലുക്ക് റിലീസ് ചെയ്തത്. സിഗ്മ പ്രൊഡക്ഷൻസിന്റെ ബാനറിൽ നിസാർ മം‍ഗലശേരിയാണ് ചിത്രം നിർമിക്കുന്നത്. കലാഭാവൻ ഷാജോണിന്റെ മകൻ യൊഹാൻ മറ്റ് പുതുമുഖ താരങ്ങളായ നെബീഷ്, ധനുഷ്, ഇർഫാൻ, ശ്രീലക്ഷ്മി, ട്രിനിറ്റി തുടങ്ങിയവരാണ് ചിത്രത്തിലെ പ്രധാന കഥാപാത്രങ്ങൾ.
ഒരു പുസ്തകത്തിനുള്ളിലേക്ക് ഒരു കൂട്ടം കുട്ടികൾ ആകാംക്ഷയോടെ നോക്കി നിൽക്കുന്ന വളരെ രസകരമായ ചിത്രമാണ് ഫസ്റ്റ്ലുക്ക് പോസ്റ്ററിലുള്ളത്.
സിജു വിൽസൻ, ജെയിംസ് ഏലിയ, മാത്യു തോമസ്, മേഘനാഥൻ, വികെ ശ്രീ രാമൻ, പ്രമോദ്, വീണ നായർ തുടങ്ങിയവരും ചിത്രത്തിൽ പ്രധാന വേഷത്തിലെത്തുന്നു. ജോ ആൻ‍‍ഡ് ജോ,18 പ്ലസ് എന്നീ ചിത്രങ്ങളുടെ സഹ എഴുത്തുകാരനാണ് രവീഷ് നാഥ്. സമാധാന പുസ്തകത്തിന്റെ തിരക്കഥ ഒരുക്കിയിരിക്കുന്നതും രവീഷ് നാഥ് തന്നെയാണ്.
ഫോർ മ്യൂസിക്സ് ആണ് ചിത്രത്തിന്റെ സംഗീതം. പ്രശസ്‍ത ക്യാമറാമാൻ സതീഷ് കുറുപ്പ് ആദ്യമായി നിർമിക്കുന്ന ചിത്രം കൂടിയാണ് ‘സമാധാന പുസ്തകം’.
