ശിവകാർത്തികേയൻ നായകനാവുന്ന ഏറ്റവും പുതിയ ചിത്രമാണ് അമരൻ. സെപ്റ്റംബറിലാണ് ചിത്രം പ്രേക്ഷകർക്ക് മുന്നിലെത്തുന്നത്. ചിത്രത്തിന്റെ അസിസ്റ്റന്റ് ഡയറക്ടർമാർക്ക് ആഡംബര വാച്ചുകൾ സമ്മാനിക്കുന്ന ശിവകാർത്തികേയന്റെ ചിത്രങ്ങളാണ് സമൂഹമാദ്ധ്യമങ്ങളിൽ ഇപ്പോൾ വൈറലാകുന്നത്. ഷൂട്ടിംഗ് ലോക്കേഷനിൽ വച്ചാണ് താരം വാച്ചുകൾ സമ്മാനിച്ചത്. കഴിഞ്ഞ ദിവസമാണ് ചിത്രത്തിന്റെ ഷൂട്ടിംഗ് പൂർത്തിയായത്.
ചിത്രങ്ങൾ പുറത്തുവന്നതിന് പിന്നാലെ ശിവകാർത്തികേയനെ പ്രശംസിക്കുകയാണ് ആരാധകർ. നേരത്തെ ചിത്രത്തിന്റെ അണിയറപ്രവർത്തകർക്ക് താരം വിരുന്ന് നൽകിയത് ഏറെ ശ്രദ്ധേയമായിരുന്നു. ഇതിന്റെ ചിത്രങ്ങളും സമൂഹമാദ്ധ്യമങ്ങളിൽ വൈറലായിരുന്നു. ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ ഉടനെ ആരംഭിക്കുമെന്ന് അണിയറപ്രവർത്തകർ അറിയിച്ചു.
രാജ്കുമാർ പെരിയസ്വാമി സംവിധാനം ചെയ്യുന്ന ചിത്രം കമൽ ഹാസനും സോണി പിക്ചേഴ്സ് ഇന്റർനാഷണൽ പ്രൊഡക്ഷൻസും ചേർന്നാണ് നിർമ്മിക്കുന്നത്. മേജർ മുകുന്ദ് വരദരാജന്റെ ജീവിത കഥ പറയുന്ന ചിത്രമാണ് അമരൻ. രാജ്കുമാർ പെരിയസാമി തന്നെയാണ് ചിത്രത്തിന്റെ തിരക്കഥ രചിച്ചിരിക്കുന്നത്. തമിഴ്, ഹിന്ദി, തെലുങ്ക് ഭാഷകളിലായിരിക്കും അമരൻ പ്രദർശനത്തിനെത്തുന്നത്. സായ്പല്ലവിയാണ് ചിത്രത്തിലെ നായിക.
