മലയാളികൾക്ക് മറക്കാൻ കഴിയാത്ത നായികമാരിൽ ഒരാളാണ് ദാദാസാഹിബ് എന്ന വിനയൻ ചിത്രത്തിൽ മമ്മൂട്ടിയുടെ നായികയായി എത്തിയ ആതിര(രമ്യ). നാലോ അഞ്ചോ വർഷങ്ങൾ മാത്രമായിരുന്നു ആതിര സിനിമയിൽ ഉണ്ടായിരുന്നത്. ചെയ്ത കഥാപാത്രങ്ങളെല്ലാം ഒന്നിനൊന്നു മികച്ചത്. മലയാള സിനിമയിൽ തിളങ്ങി വന്ന താരം പെട്ടെന്ന് ആ മേഖല ഉപേക്ഷിക്കുകയായിരുന്നു. സിനിമാ ജീവിതം ഇട്ടെറിഞ്ഞിട്ട് പോകാൻ ആതിരയ്ക്ക് ഒരു കാരണമുണ്ട്. വർഷങ്ങൾക്കുശേഷം അക്കാര്യം വെളിപ്പെടുത്തുകയാണ് താരം. ഒരു മാധ്യമത്തിൽ നൽകിയ അഭിമുഖത്തിലാണ് സിനിമാ ഫീൽഡ് ഉപേക്ഷിച്ചതിന്റെ കാരണം ആതിര വെളിപ്പെടുത്തിയത്.
“സിനിമ എന്താണെന്ന് പോലും അറിയാതെ സിനിമയിലേക്ക് വന്ന ആളാണ് ഞാൻ. സിനിമയിലേക്ക് ഒരു ചാൻസ് കിട്ടിയപ്പോൾ മോഹം തോന്നി. ദാദാ സാഹിബിൽ മമ്മൂട്ടിയുടെ നായികയായിട്ടാണ് ഞാൻ വരുന്നത്. ഭാഗ്യം കൊണ്ട് ആദ്യ ചിത്രം തന്നെ നന്നായി. ആ സിനിമയിൽ ഒപ്പം വർക്ക് ചെയ്തവരൊക്കെ നല്ല പെരുമാറ്റം ആയിരുന്നു. പിന്നീട് കരുമാടിക്കുട്ടൻ, ഭർത്താവ് ഉദ്യോഗസ്ഥൻ പോലുള്ള സിനിമകളിൽ ചാൻസ് ലഭിച്ചു. ചില അനുഭവങ്ങൾ ഉണ്ടായതിനെ തുടർന്നാണ് സിനിമാ മേഖല വേണ്ടെന്നുവച്ചത്”.
“സിനിമയിൽ നിന്നുണ്ടായ ചില അനുഭവങ്ങൾ എന്റെ ജീവിതത്തെ മൊത്തം താളം തെറ്റിച്ചു. ഇതിൽനിന്ന് എങ്ങനെയെങ്കിലും രക്ഷപ്പെടണം എന്ന അവസ്ഥയിൽ ഞാൻ എത്തി. പെട്ടെന്നാണ് ഞാൻ സിനിമ നിർത്തിയത്. ഞാനെന്റെ ഫോൺ നമ്പർ വരെ ഉപേക്ഷിച്ചു. മോശം അനുഭവങ്ങളാണ് എനിക്ക് ഉണ്ടായത്. സിനിമാ ഫീൽഡ് അറിയില്ലാത്തതുകൊണ്ടാവാം. ഒരു കണ്ണീരായി എന്റെ മനസ്സിൽ ഇപ്പോഴും അതുണ്ട്”.
“സിനിമയിലേക്ക് പോകേണ്ടായിരുന്നു എന്നുപോലും തോന്നി. പുറത്തിറങ്ങാൻ ഒരു ഭയമായി പോയി. സിനിമയിലേക്ക് വരുമ്പോൾ കാണുന്ന മുഖമല്ല, സിനിമയിൽ വന്നു കഴിഞ്ഞാൽ കാണുന്നത്. അടുത്ത് സംസാരിക്കുമ്പോൾ പലരും ചോദിക്കുന്നത് മറ്റൊന്നാണ്. നേരിട്ട് നമ്മളോട് ചോദിക്കാൻ ആർക്കും മടിയില്ല. എല്ലാവർക്കും അത് തരണം ചെയ്യാൻ പറ്റണമെന്നില്ല. അതുകൊണ്ടാണ് എങ്ങനെയെങ്കിലും അതിൽ നിന്ന് രക്ഷപ്പെടണം എന്ന് തോന്നിയത്. ഒറ്റയടിക്ക് ഇട്ടെറിഞ്ഞ് പോവുകയായിരുന്നു സിനിമ. ആത്മഹത്യയെ കുറിച്ച് പോലും ഞാൻ ചിന്തിച്ചിരുന്നു”-ആതിര പറഞ്ഞു.
