ഒരുകാലത്ത് മലയാള സിനിമയിൽ നിറഞ്ഞുനിന്ന നടിയായിരുന്നു ഉഷ എന്ന ഹസീന ഹനീഫ്. കിരീടം, കാർണിവൽ, കോട്ടയം കുഞ്ഞച്ചൻ തുടങ്ങിയ സിനിമകളിൽ ഹസീന ചെയ്ത വേഷങ്ങൾ മലയാളികൾക്ക് പ്രിയപ്പെട്ടവയാണ്. ഇന്ന് സീരിയലിലാണ് താരം കൂടുതൽ സജീവമായി നിൽക്കുന്നത്. ഇപ്പോഴിതാ, സിനിമാ ജീവിതത്തെ തന്നെ മാറ്റിമറിച്ച തന്റെ വിവാഹത്തെപ്പറ്റി മനസ്സ് തുറക്കുകയാണ് ഹസീന. സംവിധായകൻ ടി എസ് സുരേഷ് ബാബുവുമായുള്ള വിവാഹം, പിന്നീടുണ്ടായ വേർപിരിയൽ, രണ്ടാം വിവാഹം എന്നിവ സിനിമാ ജീവിതത്തെ ബാധിച്ചുവെന്ന് താരം പറയുന്നു. മമ്മൂട്ടിയുമായി ഈ സമയത്തുണ്ടായ പിണക്കങ്ങളെപ്പറിയും ഹസീന തുറന്നു പറഞ്ഞു. ഒരു ഓൺലൈൻ മാധ്യമത്തിനു നൽകിയ അഭിമുഖത്തിലാണ് നടി മനസ്സ് തുറന്നത്.
“പ്രണയം എന്നൊന്നും പറയാൻ പറ്റില്ല, ഒരു പാവം മനുഷ്യൻ ആയിരുന്നു സുരേഷ്. അങ്ങനെ സംഭവിച്ചു. കോട്ടയം കുഞ്ഞച്ചന് മുന്നേ സുരേഷ് ബാബുവിനെ എനിക്കറിയാം. സുരേഷ് ബാബുവുമായി ഒന്നിക്കാൻ തീരുമാനിച്ചത് ബാപ്പയ്‌ക്ക് വലിയ സങ്കടമായി. ബന്ധുക്കളും ഒരുപാട് കുറ്റം പറഞ്ഞിരുന്നു. പക്ഷേ, ഞങ്ങൾ വിവാഹം കഴിച്ചു. എന്നാൽ പിന്നീട് ഒരുപാട് പ്രശ്നങ്ങൾ ഉണ്ടായി, അങ്ങനെ വേർപിരിയുകയായിരുന്നു. അദ്ദേഹവുമായുള്ള വിവാഹം എന്റെ കരിയറിനെ തന്നെ ഒരുപാട് ബാധിച്ചിരുന്നു. പല സിനിമകളും നഷ്ടമായി”.
“സുരേഷ് ബാബുവുമായുള്ള എന്റെ ബന്ധത്തെപ്പറ്റി മമ്മൂക്കയോട് ബാപ്പ സംസാരിച്ചിരുന്നു. സുരേഷ് ബാബുവിനെ കാര്യം പറഞ്ഞ് മനസ്സിലാക്കണം എന്ന് അദ്ദേഹത്തോട് ബാപ്പ പറഞ്ഞു. പറയാമെന്ന് മമ്മൂക്ക വാക്കും കൊടുത്തിരുന്നു. സുരേഷിനോട് വിളിച്ച് മമ്മൂക്ക കാര്യവും പറഞ്ഞിരുന്നു. പക്ഷേ എന്നിട്ടും ഞങ്ങൾ വിവാഹം കഴിച്ചു. അദ്ദേഹം പറഞ്ഞിട്ടും വിവാഹം കഴിച്ചതിന്റെ ആവും പിണക്കം. ആ സമയത്ത് സംസാരിക്കാറേ ഇല്ലായിരുന്നു മമ്മൂക്ക. സുരേഷുമായി വിവാഹം കഴിഞ്ഞതിന് ശേഷം അദ്ദേഹം മിണ്ടാറില്ല”.
“അങ്ങോട്ട് ചെന്ന് മമ്മൂട്ടിയോട് സംസാരിച്ചാലും അദ്ദേഹം മിണ്ടില്ല. കുറെ പ്രാവശ്യം ഗുഡ് മോർണിംഗ് പറഞ്ഞിട്ടും അദ്ദേഹം മൈൻഡ് ചെയ്യാത്തത് കൊണ്ട് മിണ്ടാൻ പോകുന്നത് ഞാനും നിർത്തി. പക്ഷേ, നാസറുമായുള്ള വിവാഹം കഴിഞ്ഞതിനുശേഷം മമ്മൂക്ക ഒരുതവണ എന്നോട് മിണ്ടി. നടന്നു പോയപ്പോൾ അദ്ദേഹം എന്റെ കയ്യിൽ പിടിച്ചു കൊണ്ട് പറഞ്ഞു, ‘കല്യാണമൊക്കെ കഴിഞ്ഞു അല്ലേ.. എല്ലാം ഞാൻ അറിയുന്നുണ്ട്. നന്നായി വരട്ടെ’ എന്ന്”- ഉഷ പറഞ്ഞു.
