മലയാളികളുടെ പ്രിയതാരം ഉണ്ണിമുകുന്ദൻ പ്രധാന കഥാപാത്രമാകുന്ന തമിഴ് ചിത്രമാണ് ഗരുഡൻ. തമിഴിൽ വീണ്ടും ശക്തമായ വേഷത്തിലാണ് താരമെത്തുന്നത്. പ്രേക്ഷകർ ആവേശത്തോടെ കാത്തിരിക്കുന്ന ചിത്രം ഇന്നാണ് തിയേറ്ററുകളിലെത്തുന്നത്. വെട്രിമാരന്റെ തിരക്കഥയിൽ ഒരുങ്ങിയ ചിത്രം ദുരൈ സെന്തിൽ കുമാറാണ് സംവിധാനം ചെയ്തത്. ഉണ്ണി മുകുന്ദനോടൊപ്പം ശശി കുമാറും സൂരിയും ചിത്രത്തിൽ പ്രധാന വേഷത്തിലെത്തുന്നുണ്ട്.
തികച്ചും വ്യത്യസ്ത വേഷത്തിലാണ് ഉണ്ണി മുകുന്ദൻ ചിത്രത്തിലെത്തുന്നത്. നീണ്ട ഇടവേളയ്ക്ക് ശേഷമുള്ള ഉണ്ണി മുകുന്ദന്റെ ചിത്രത്തിനായി ആരാധകരും ഏറെ പ്രതീക്ഷയോടെയാണ് കാത്തിരിക്കുന്നത്. ഒരു ഗ്രാമത്തിന്റെ പശ്ചാത്തലത്തിൽ നടക്കുന്ന സംഭവ വികാസങ്ങളാണ് ഗരുഡന്റെ കഥാഗതി. വ്യത്യസ്ത മേക്ക് ഓവറിലാണ് താരങ്ങളെത്തുന്നത്.
ശശി കുമാറിന്റെ സഹോദരന്റെ വേഷമാണ് ഉണ്ണി മുകുന്ദൻ ചിത്രത്തിൽ അവതരിപ്പിക്കുന്നത്. ശിവദ, രോഷിണി ഹരിപ്രിയൻ ചിത്രത്തിലെ മറ്റ് നായികമാർ. സമുദ്രക്കനി, മൈം ഗോപി, മൊട്ട രാജേന്ദ്രൻ എന്നിവരാണ് ചിത്രത്തിലെ മറ്റ് അഭിനേതാക്കൾ. ആക്ഷന് പ്രാധാന്യം നൽകുന്ന ചിത്രത്തിന്റെ സംഗീതം യുവൻ ശങ്കർ രാജയാണ്. ലാർക്ക് സ്റ്റുഡിയോസും ഗ്രാസ്റൂട്ട് ഫിലിം കമ്പനിയും ചേർന്നാണ് ഗരുഡൻ നിർമിച്ചത്.
