നിർത്താതെ പെയ്യുന്ന ഒരു മഴ എങ്ങനെ മനുഷ്യരാശിയെ പിടിച്ചു കുലുക്കുന്നുവെന്ന് കഴിഞ്ഞ ഏതാനും വർഷങ്ങളായി നാം കണ്ടുകൊണ്ടിരിക്കുകയാണ്. മഴക്കെടുതിയിൽപ്പെട്ട് ജനജീവിതം ആടിയുലയുമ്പോൾ പണ്ട് എപ്പോഴോ സംസ്ഥാന സർക്കാർ പ്രഖ്യാപിച്ച ‘സ്പോഞ്ച് സിറ്റി’ ആശയം വർഷങ്ങൾ പിന്നിട്ടിട്ടും ഇന്നും പ്രാബല്യത്തിൽ വന്നിട്ടില്ല. മഴക്കാലത്തെ വെള്ളക്കെട്ടുകളെ തടയാൻ സ്പോഞ്ച് സിറ്റികൾക്ക് സാധിക്കുമെന്നാണ് പറയപ്പെടുന്നത്. എന്താണ് സ്പോഞ്ച് സിറ്റി? മഴക്കാലത്തെ വെള്ളക്കെട്ടുകളെ സ്പോഞ്ച് സിറ്റി എങ്ങനെ തടയും? അറിയാം..
സ്പോഞ്ച് സിറ്റി
പേര് സൂചിപ്പിക്കുന്ന പോലെ വെള്ളത്തിനെ വലിച്ചെടുക്കാൻ സാധിക്കുന്ന തരത്തിലുള്ള നഗരവത്ക്കരണമാണ് സ്പോഞ്ച് സിറ്റിയിലൂടെ ലക്ഷ്യം വയ്ക്കുന്നത്. ഒരു സ്പോഞ്ച് എങ്ങനെ ജലം വലിച്ചെടുക്കുന്നുവോ അത്തരത്തിൽ നഗരങ്ങളിൽ വെള്ളക്കെട്ട് രൂപപ്പെടാതെ സ്പോഞ്ച് സിറ്റിയും പ്രവർത്തിക്കുന്നു. പ്രകൃതിദത്തമായ രീതികൾ ശാസ്ത്രീയമായി ഉപയോഗപ്പെടുക്കുകയാണ് ഇവിടെ ചെയ്യുന്നത്. പ്രത്യേക പ്രദേശങ്ങളിൽ ധാരാളം മരങ്ങളും തടാകങ്ങളും നിർമിച്ച് ജലം വലിച്ചെടുക്കാൻ സാധിക്കുന്ന തരത്തിൽ നഗരങ്ങളെ മാറ്റിയെടുക്കുന്ന പദ്ധതിയാണിത്. അധിക ജലം വലിച്ചെടുത്ത് ആവശ്യ ഘട്ടങ്ങളിൽ ഉപകരിക്കാൻ സാധിക്കുന്ന വിധത്തിലാണ് ഈ സിറ്റികളുടെ പ്രവർത്തനം നടക്കുക.
പൂന്തോട്ടങ്ങൾ ഒരുക്കിയും, കനാലുകൾ ശുചീകരിച്ചും, മഴക്കാലത്തിന് മുന്നേ ഓടകളും ചാലുകളും വൃത്തിയാക്കിയും മഴക്കുഴികൾ കുഴിച്ചും തടാകങ്ങൾ നിർമിച്ചുമൊക്കെ വെള്ളത്തെ വലിച്ചെടുക്കാൻ സാധിക്കുന്നു. ഇത്തരത്തിൽ കുത്തിയൊലിച്ചു വരുന്ന വെള്ളം പലയിടങ്ങളിലായി ശേഖരിച്ചു വയ്ക്കുമ്പോൾ വെള്ളക്കെട്ട് ഉണ്ടാവുന്നത് ഒരു പരിധി വരെ തടയാനാകുമെന്നും വരൾച്ചാ സമയത്ത് ശേഖരിച്ചു വച്ച ജലം പ്രയോജനപ്പെടുത്താൻ സാധിക്കുമെന്നും ഗവേഷകർ പറയുന്നു.
ചൈനീസ് ലാൻഡ്സ്കേപ് ആർക്കിടെക്റ്റായ കൊങ് ജിയാൻ യു ആണ് സ്പോഞ്ച് സിറ്റി എന്ന ആശയത്തിന്റെ പിന്നിൽ പ്രവർത്തിച്ച വ്യക്തി. അപ്രതീക്ഷിതമായി തന്റെ പ്രദേശം നേരിട്ട പ്രളയത്തിൽ ഒരുപാട് ജീവന് പൊലിഞ്ഞതിന്റെ മനോവേദനയിലാണ് ഇത്തരത്തിലൊരു ആശയത്തിന് അദ്ദേഹം തുടക്കം കുറിച്ചത്. ഇതനുസരിച്ച് ചൈനീസ് സർക്കാർ 16 നഗരങ്ങളിലായി പദ്ധതി പ്രാവർത്തികമാക്കി. അങ്ങനെ ഷെൻസൻ ആദ്യത്തെ സ്പോഞ്ച് നഗരമായി. ഇന്ത്യയിലും സ്പോഞ്ച് നഗരമുണ്ട്. ചെന്നൈയാണ് ഇന്ത്യയിലെ ആദ്യത്തെ സ്പോഞ്ച് നഗരം.
