ന്യൂഡൽഹി: ടി20 ലോകകപ്പിന്റെ സൂപ്പർ 8ന് ഒരുങ്ങുന്ന ടീം ഇന്ത്യ കഠിന പരിശീലനത്തിലാണെന്ന് ക്യാപ്റ്റൻ രോഹിത് ശർമ്മ. ടീമിലെ ഓരോരുത്തരും മത്സരത്തിൽ കൂടുതൽ ശ്രദ്ധകേന്ദ്രീകരിക്കാനും അവരുടെ കഴിവുകൾ മെച്ചപ്പെടുത്തുന്നതിനുമായുള്ള തയ്യാറെടുപ്പുകൾ ആരംഭിച്ചതായി അദ്ദേഹം പറഞ്ഞു.
” ടൂർണമെന്റിന്റെ രണ്ടാം ഘട്ടത്തിനായി ഒരുങ്ങുകയാണെന്ന് നിങ്ങൾക്ക് എല്ലാവർക്കും അറിയാം. എല്ലാ താരങ്ങളും മത്സരത്തിന് കൂടുതൽ പ്രാധാന്യം നൽകികൊണ്ട് അവരുടെ സ്ട്രെംഗ്തുകൾ വർദ്ധിപ്പിക്കാനുള്ള പരിശീലനം തുടങ്ങി. ഒരു മത്സരത്തിന് ശേഷം മൂന്നോ നാല് ദിവസത്തിനുള്ളിലാണ് ഞങ്ങൾ അടുത്ത മത്സരങ്ങൾ നേരിടുന്നത്. ഇതിൽ അൽപം സമ്മർദ്ദമുണ്ടെങ്കിലും അതിനോട് പൊരുത്തപ്പെടാനുള്ള ശ്രമത്തിലാണ്. ഇനിയുള്ള മത്സരങ്ങൾ കഠിനമേറിയതായിരിക്കും. എന്നാൽ ഓരോ ദിവസവും ഞങ്ങളുടെ കഴിവുകൾ തേച്ചുമിനുക്കാനുള്ള പരിശീലനമാണ് നടക്കുന്നത്. മത്സരങ്ങൾ കൂടുതൽ ഗൗരവത്തോടെ കാണും.”- രോഹിത് ശർമ്മ പറഞ്ഞു.
അയർലൻഡ്, പാകിസ്താൻ, അമേരിക്ക ടീമുകളെ പരാജയപ്പെടുത്തിയാണ് ഇന്ത്യ സൂപ്പർ 8ൽ എത്തിയത്. ജൂൺ 20നാണ് ഇന്ത്യ- അഫ്ഗാനിസ്ഥാൻ സൂപ്പർ 8 പോരാട്ടം നടക്കുന്നത്. ജൂൺ 22ന് ബംഗ്ലാദേശിനെയും ജൂൺ 24ന് ഓസ്ട്രേലിയയെയും ഇന്ത്യ നേരിടും.
