കൊൽക്കത്ത: പശ്ചിമ ബംഗാളിൽ നടന്ന കോടികളുടെ റേഷൻ വിതരണ കുംഭകോണവുമായി ബന്ധപ്പെട്ട് പ്രശസ്ത ബംഗാളി നടി ഋതുപർണ സെൻഗുപ്തയെ ഇഡി ചോദ്യം ചെയ്തു. കൊൽക്കത്തയിലെ ഇഡി ഓഫീസിൽ വച്ചായിരുന്നു ചോദ്യം ചെയ്യൽ.
പൊതുവിതരണത്തിനുള്ള റേഷൻ തട്ടിയെടുത്ത് പൊതുവിപണിയിൽ നൽകിയ കേസിൽ ഇഡി അന്വേഷണം ശക്തമാക്കുന്ന വേളയിലാണ് ഋതുപർണയെയും ചോദ്യം ചെയ്യുന്നത്. റേഷൻ വിതരണ കുംഭകോണ കേസിൽ തൃണമൂൽ കോൺഗ്രസ് നേതാവ് ജ്യോതിപ്രിയ മല്ലിക്കിനെ നേരത്തെ ഇഡി അറസ്റ്റ് ചെയ്തിരുന്നു.
പശ്ചിമ ബംഗാളിലെ റേഷൻ വിതരണ കേസുമായി നടിക്കുള്ള ബന്ധത്തെ കുറിച്ചുള്ള വിവരങ്ങളൊന്നും ഇതുവരെയും പുറത്ത് വന്നിട്ടില്ല. ഋതുപർണ സെൻഗുപ്തയും വിഷയത്തിൽ ഇതുവരെയും പ്രതികരിച്ചില്ല. ആദ്യമായിട്ടല്ല ഋതുപർണയെ ഇഡി ചോദ്യം ചെയ്യുന്നത്. പശ്ചിമ ബംഗാളിലെ കോടികളുടെ റോസ് വാലി ചിട്ടി ഫണ്ട് അഴിമതിയുമായി ബന്ധപ്പെട്ട് 2019 ലും ഇഡി ഇവരെ ചോദ്യം ചെയ്തിരുന്നു.
