വിജയവാഡ: സംസ്ഥാന സർക്കാർ ധൂപ ദീപാദികൾക്കായി പ്രതിമാസ ഗ്രാന്റായി ക്ഷേത്രങ്ങൾക്ക് നൽകുന്ന തുക 5,000 രൂപയിൽ നിന്ന് 10,000 രൂപയായി ഉയർത്തിയതായി ആന്ധ്രാ ദേവസ്വം മന്ത്രി ആനം രാമനാരായണ റെഡ്ഡി പറഞ്ഞു. ആന്ധ്രാപ്രദേശിലുടനീളമുള്ള ക്ഷേത്രങ്ങളിലെ നവീകരണത്തിനും മറ്റ് വികസന പ്രവർത്തനങ്ങൾക്കും മേൽനോട്ടം വഹിക്കാൻ പ്രത്യേക സമിതി രൂപീകരിക്കുമെന്നും അദ്ദേഹം പറഞ്ഞു.
വ്യാഴാഴ്ച ഗൊല്ലപ്പുഡിയിലെ എൻഡോവ്മെൻ്റ് കമ്മീഷണർ ഓഫീസിൽ എൻഡോവ്മെൻ്റ് മന്ത്രിയായി ചുമതലയേറ്റ ശേഷം സംസാരിക്കുകയായിരുന്നു അദ്ദേഹം. ക്ഷേത്രങ്ങളുടെ പ്രതിമാസ അറ്റകുറ്റപ്പണികൾ വർദ്ധിപ്പിക്കുക, സംസ്ഥാനത്തെ പഴയതും ജീർണ്ണിച്ചതുമായ ക്ഷേത്രങ്ങളുടെ പുനരുദ്ധാരണം നിരീക്ഷിക്കാൻ മുതിർന്ന ഉദ്യോഗസ്ഥരുടെ ഒരു കമ്മിറ്റി രൂപീകരിക്കുക എന്നീ തീരുമാനങ്ങളുടെ ഫയലുകളിൽ രാമനാരായണ റെഡ്ഡി ഒപ്പുവച്ചു.
മാധ്യമങ്ങളെ അഭിസംബോധന ചെയ്ത റെഡ്ഡി “സംസ്ഥാനത്തുടനീളമുള്ള പഴയതും ചരിത്രപരവുമായ എല്ലാ ക്ഷേത്രങ്ങളും അവയുടെ പഴയ പ്രതാപം വീണ്ടെടുക്കാൻ ചന്ദ്രബാബു നായിഡുവിന്റെ സർക്കാർ ലക്ഷ്യമിടുന്നതായി” തറപ്പിച്ചു പറഞ്ഞു. ക്ഷേത്രങ്ങളുടെ ഓരോ സെൻ്റ് ഭൂമിയും സംരക്ഷിക്കാൻ സർക്കാർ പ്രതിജ്ഞാബദ്ധമാണെന്നും അദ്ദേഹം പറഞ്ഞു.
“വൈഎസ്ആർസി ഭരണകാലത്ത് സംസ്ഥാനത്തെ പല ക്ഷേത്രങ്ങളും ഉപേക്ഷിക്കപ്പെട്ടു, ചിലത് അസ്തിത്വ പ്രശ്നങ്ങൾ നേരിടുന്നു. രാജ്യത്തെ മറ്റ് പ്രശസ്തമായ ക്ഷേത്രങ്ങൾക്ക് തുല്യമായി ആ ക്ഷേത്രങ്ങൾ നവീകരിക്കാനും വികസിപ്പിക്കാനും ഞങ്ങൾക്ക് കർമ്മ പദ്ധതിയുണ്ട്, ”രാമനാരായണ റെഡ്ഡി പറഞ്ഞു.
എൻഡോവ്മെൻ്റ് വകുപ്പിന്റെ കീഴിലുള്ള 26,000 ക്ഷേത്രങ്ങളിലെ വികസന പ്രവർത്തനങ്ങൾ മഠാധിപതികൾ ഉൾപ്പെടെയുള്ള മത നേതാക്കളിൽ നിന്ന് നിർദ്ദേശങ്ങൾ സ്വീകരിച്ച ശേഷമേ നടത്തുകയുള്ളൂവെന്ന് അദ്ദേഹം പറഞ്ഞു.
ക്ഷേത്രവുമായി ബന്ധപ്പെട്ട പ്രവർത്തനങ്ങളിൽ ഇനി മുതൽ ഏകപക്ഷീയമായ തീരുമാനങ്ങൾ ഉണ്ടാകില്ല. മതമേലധ്യക്ഷന്മാരുടെ നിർദ്ദേശങ്ങളും അഭിപ്രായങ്ങളും പരിഗണിക്കും,” അദ്ദേഹം പറഞ്ഞു
