അനന്ത് അംബാനിയുടെയും രാധികാ മെർച്ചന്റിന്റെയും വിവാഹത്തിന് മുന്നോടിയായി നടന്ന സംഗീതിൽ താരങ്ങളായി മുകേഷ് അംബാനിയും നിതാ അംബാനിയും. ആഘോഷത്തിന്റെ ഭാഗമായി ഇരുവരുടെയും വളരെ രസകരമായ വീഡിയോ വേദിയിൽ പ്രദർശിപ്പിച്ചു. കൊച്ചുമക്കളോടൊപ്പം കാറിൽ യാത്ര ചെയ്യുന്നതാണ് വീഡിയോ. വീഡിയോ സമൂഹമാദ്ധ്യമ ലോകത്ത് ഏറെ ശ്രദ്ധേയമാവുകയാണ്.
വേദിയിലെ വലിയ സ്ക്രീനിൽ പ്രദർശിപ്പിച്ച വീഡിയോ അതിഥികളുടെ ശ്രദ്ധയാകർഷിക്കുകയും കയ്യടി നേടുകയും ചെയ്തു. ആകാശ് അംബാനിയുടെയും ശ്ലോക മേത്തയുടെയും മക്കൾ പൃഥ്വി, വേദ എന്നിവരും ഇഷ അംബാനിയുടെയും ആനന്ദ് പിരാമലിന്റെയും ഇരട്ട കുട്ടികളായ ആദിയ, കൃഷ്ണ എന്നിവരുമാണ് വീഡിയോയിലുള്ളത്.
കുട്ടികൾ കാറിലിരുന്ന് ബലൂൺ വീർപ്പിക്കുന്നതും കളിക്കുന്നതും വീഡിയോയിൽ കാണാം. ഷമ്മി കപൂർ നായകനായി 1968-ൽ പുറത്തിറങ്ങിയ ബ്രഹ്മചാരി എന്ന ചിത്രത്തിലെ “ചക്കേ മേൻ ചക്ക”എന്ന ഗാനമാണ് വീഡിയോയിൽ ഉൾപ്പെടുത്തിയിരിക്കുന്നത്. വളരെ രസകരമായ ദൃശ്യങ്ങൾ കോർത്തിണക്കിയതാണ് വീഡിയോ.
ആയിരക്കണക്കിന് അതിഥികളുടെ മുന്നിൽ പ്രദർശിപ്പിച്ച വീഡിയോ സമൂഹമാദ്ധ്യമങ്ങളിലൂടെ പുറത്തുവന്നിട്ടുണ്ട്. ഗാനത്തിന് ചൂണ്ടുകൾ ചലിപ്പിക്കുന്ന മുകേഷ് അംബാനിയുടെ പ്രകടനത്തെ സോഷ്യൽ മീഡിയ ഏറ്റെടുത്തിരിക്കുകയാണ്.
