മലയാളികളുടെ പ്രിയപ്പെട്ട നടിയാണ് ലക്ഷ്മി ഗോപാലസ്വാമി. ഒരുപാട് സിനിമകളിൽ പ്രണയിനിയായും കുടുംബിനിയായും അഭിനയിച്ച് പ്രേക്ഷകരുടെ മനം കവർന്ന താരം തന്റെ 53-ആം വയസ്സിലും അവിവാഹിതയായി തുടരുകയാണ്. വിവാഹം കഴിക്കണമെന്നോ കുട്ടികൾ വേണമെന്നോ തനിക്ക് ഇതുവരെ തോന്നിയിട്ടില്ല എന്നാണ് ലക്ഷ്മി ഗോപാലസ്വാമി പറയുന്നത്. ചിലപ്പോഴൊക്കെ ഒറ്റപ്പെടുന്നതായി തോന്നിയിട്ടുണ്ടെങ്കിലും അതിനൊക്കെ സ്വയം പരിഹാരം കണ്ടെത്തിയിരുന്നുവെന്നും താരം ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ പറഞ്ഞു.
“എനിക്ക് അങ്ങനെ ഒരു ആഗ്രഹം തോന്നുന്നേയില്ല. അമ്മമാർ കുട്ടികളെ രാവിലെ സ്കൂളിൽ വിടാൻ ബാഗെല്ലാം പിടിച്ച് നിൽക്കുമ്പോൾ ഞാൻ ഓർക്കാറുണ്ട്. അവർക്ക് എന്തുമാത്രം ക്ലേശവും ഉത്തരവാദിത്വവും ഉണ്ട്. അമ്മയാകാൻ എളുപ്പമല്ല. എനിക്ക് വേണ്ടി അമ്മ എന്തെല്ലാം ചെയ്തു എന്ന് എനിക്കറിയാം. ചില സ്ത്രീകൾക്ക് അമ്മയാകാൻ ഒരു ആഗ്രഹമാണ്”.
“ഒരു കുടുംബം ഉണ്ടാകണമെന്നും കുട്ടികൾ വേണമെന്നും ചിലർക്ക് ആഗ്രഹമുണ്ട്. പക്ഷേ എനിക്ക് അങ്ങനെ തോന്നിയിട്ടില്ല. അങ്ങനെ ഒരു ആഗ്രഹമേ ഇല്ല. എന്റെ കുടുംബത്തിലും സുഹൃത്തുക്കളിലും എല്ലാം കല്യാണം കഴിച്ചവർ ഉണ്ട്. പക്ഷേ അതൊന്നും എന്നെ ആകർഷിച്ചിട്ടില്ല. കുട്ടികളെയൊക്കെ എനിക്കിഷ്ടമാണ്. എന്നാൽ അമ്മയാവുക എന്ന് പറയുന്നത് വേറൊരു ഉത്തരവാദിത്വമാണ്. എന്തോ എനിക്കത് പറ്റില്ല. ചിലപ്പോഴൊക്കെ ഒറ്റയ്ക്കാണെന്ന് തോന്നിയിട്ടുണ്ട്. പക്ഷേ അതിനെല്ലാം പരിഹാരം നമുക്ക് തന്നെ കണ്ടെത്താൻ കഴിയും”- ലക്ഷ്മി ഗോപാലസ്വാമി പറഞ്ഞു.
