മുകേഷ് അംബാനിയുടെ മകൻ അനന്ത് അംബാനിയുടെയും രാധികാ മെർച്ചന്റിന്റെയും വിവാഹവും അതിന്റെ ഭാഗമായി നടന്ന ആഘോഷങ്ങളുമായിരുന്നു കഴിഞ്ഞ ഏതാനും ദിവസങ്ങളായി സമൂഹമാദ്ധ്യമങ്ങളിൽ നിറഞ്ഞു നിന്നിരുന്നത്. ആഘോഷവേളയിൽ മകനോടും മരുമകളോടും മുകേഷ് അംബാനി പങ്കുവച്ച വാക്കുകളാണ് സമൂഹമാദ്ധ്യമത്തിൽ ശ്രദ്ധേയമാകുന്നത്.
അനന്തിന്റെ ഹൃദയത്തിൽ എന്നെന്നും രാധിക എന്ന് പറഞ്ഞുകൊണ്ടാണ് മുകേഷ് അംബാനി സംസാരിക്കാൻ തുടങ്ങിയത്. സനാതന ധർമ്മമനുസരിച്ച് വിവാഹം നടത്തുമ്പോൾ ദാമ്പത്യജീവിതം കൂടുതൽ ദൃഢമാകുന്നു. തന്റെ മകൻ എന്നും രാധികയെ സന്തോഷത്തോടെ കൂടെ നിർത്തും. അവരുടെ ദാമ്പത്യജീവിതം മനോഹരവും ആനന്ദകരവുമായിരിക്കും.
വിഷ്ണുവിന്റെ ഹൃദയത്തിൽ ലക്ഷ്മി വസിക്കുന്നത് പോലെ അനന്തിന്റെ ഹൃദയത്തിൽ എന്നെന്നും രാധിക ഉണ്ടായിരിക്കും. ഇവരുടെ ജീവിതത്തിൽ സന്തോഷവും, ആരോഗ്യവും വിജയവും ഉണ്ടാകാൻ ഭഗവാൻ വിഷ്ണുവിനോട് പ്രാർത്ഥിക്കുന്നു. ഒരു കുടുംബത്തിന്റെ അടിസ്ഥാനമാണ് വിവാഹം. മനുഷ്യരാശിയുടെ തുടക്കവും ഐക്യത്തിന്റെയും വളർച്ചയുടെയും അടയാളവുമാണിതെന്നും മുകേഷ് അംബാനി പറഞ്ഞു.
അനന്തിന്റെയും രാധികയുടെയും വിവാഹത്തിന് ശേഷം നടന്ന ആഘോഷ വേദിയിലാണ് മുകേഷ് അംബാനി ഇക്കാര്യം പറഞ്ഞത്. ബോളിവുഡ്, ഹോളിവുഡ് താരങ്ങൾ, വ്യവസായികൾ, കായിക താരങ്ങൾ, രാഷ്‌ട്രീയക്കാർ എന്നിവർ പങ്കെടുത്ത വിവാഹം കഴിഞ്ഞ 12-ന് മുംബൈയിലെ ജിയോ വേൾഡ് കൺവെൻഷൻ സെന്ററിലാണ് നടന്നത്.
