നീറ്റിൽ രാജ്യമാകെ ആശങ്കകൾ ഉടലെടുത്തപ്പോഴും സുപ്രീംകോടതി വരെ വിഷയം എത്തിയപ്പോഴും മാർക്ക് വെട്ടിക്കുറച്ച് ഫലം പ്രസിദ്ധീകരിച്ചപ്പോഴും ആത്മവിശ്വാസം കൈവിടാതെ അവനിരുന്നു. ഒടുവിൽ ഇന്ന് നീറ്റ് യുജി റാങ്ക് പുനഃപ്രസിദ്ധീകരിച്ചതിന് പിന്നാലെ സന്തോഷത്തിലും അഭിമാനത്തിലുമാണ് കണ്ണൂർ പള്ളിക്കര സ്വദേശി ശ്രീനന്ദ് ഷർമിൾ. ഒന്നാം റാങ്ക് നിലനിർത്തിയതിന്റെ സന്തോഷത്തിനൊപ്പം റാങ്ക് പട്ടികയിൽ ഉൾപ്പെട്ട ഏക മലയാളിയെന്ന നേട്ടവും ശ്രീനന്ദിന്റെ പേരിലാണ്.
ഫലം വന്നതിന് പിന്നാലെ വീട്ടിലും നാട്ടിലും ആഘോഷം ആരംഭിച്ച് കഴിഞ്ഞു. പൂമാലയും പൂച്ചെണ്ടുമായി നാടൊന്നാകെ വീട്ടിലെത്തി. എല്ലാവർക്കും മധുരം വിളമ്പിയാണ് വീട്ടുകാർ മകന്റെ വിജയം ആഘോഷമാക്കിയത്. ഒന്നാം റാങ്ക് ലഭിച്ചതിന്റെ സന്തോഷത്തിലാണ് ശ്രീനന്ദ്. ആദ്യ ഫലം വന്നപ്പോൾ ഏറെ സന്തോഷത്തിലായിരുന്നു. 720-ൽ 720 കിട്ടിയതിന്റെ സന്തോഷമേറെയായിരുന്നു. പക്ഷേ രണ്ട് ദിവസം കഴിഞ്ഞപ്പോൾ മുതൽ നീറ്റ് ഫലം സംബന്ധിച്ച വിവാദങ്ങൾ ഉടലെടുത്തത്. പിന്നാലെ ചെറിയ സമർദ്ദം അലട്ടിയിരുന്നുവെന്നും എന്നാൽ പുതുക്കിയ ഫലം വന്നതോടെ സന്തോഷത്തിലാണെന്നും ശ്രീനന്ദ് പറയുന്നു.
മാർക്ക് വെട്ടിക്കുറയ്ക്കുമെന്ന വിധിയിൽ തനിക്ക് ആശങ്കയുണ്ടായിരുന്നില്ലെന്നും ശ്രീനന്ദ് പറഞ്ഞു. താൻ എഴുതിയ ഉത്തരം ശരിയാണെന്ന് ഉറച്ച് വിശ്വസിച്ചിരുന്നു. പുനഃപരീക്ഷ നടക്കില്ലെന്നും ഉറപ്പുണ്ടായിരുന്നുവെന്നും ശ്രീനന്ദ് കൂട്ടിച്ചേർത്തു. ഡൽഹി എയിംസാണ് തന്റെ അടുത്ത ലക്ഷ്യമെന്നും അഡ്മിഷൻ ലഭിക്കുമെന്ന് ഉറച്ച വിശ്വാസമുണ്ടെന്നും ശ്രീനന്ദ് പറഞ്ഞു.
ആദ്യ ഫലം വന്നപ്പോൾ ഒന്നാം റാങ്ക് നേടിയ 61 പേരിൽ നാല് മലയാളികളുണ്ടായിരുന്നു. പുതുക്കിയ റാങ്ക് പട്ടികയിൽ 17 പേരാണ് ഉൾപ്പെട്ടത്. ഫിസിക്സ് പരീക്ഷയിലെ തെറ്റായ ഉത്തരത്തിന് നൽകിയ മാർക്ക് വെട്ടിക്കുറച്ചാണ് റാങ്ക് പട്ടിക പ്രസിദ്ധീകരിച്ചത്.
