തിരുവനന്തപുരം: സംസ്ഥാന സർക്കാർ നേട്ടങ്ങൾ മറ്റ് സംസ്ഥാനങ്ങളിലെ തീയേറ്ററുകളിൽ പ്രദർശിപ്പിക്കാൻ കേരളം. അഞ്ച് സംസ്ഥാനങ്ങളിൽ പ്രദർപ്പിക്കാനായി 18 ലക്ഷം രൂപ അനുവദിച്ച് സംസ്ഥാന സർക്കാർ ഉത്തരവിറക്കി.
ഓണക്കാലത്ത് കോടികൾ കണ്ടെത്തേണ്ട സാഹചര്യത്തെ എങ്ങനെ അഭിമുഖീകരിക്കുമെന്ന് അറിയാതെ ധനവകുപ്പ് നെട്ടോട്ടമോടുന്ന സമയത്താണ് നേട്ടങ്ങൾ പ്രദർശിപ്പിക്കാൻ 18 ലക്ഷം രൂപ സർക്കാർ ചെലവാക്കുന്നത്. കർണാടക, ആന്ധ്രപ്രദേശ്, മഹാരാഷ്‌ട്ര, മധ്യപ്രദേശ്, ഡൽഹി തുടങ്ങിയ സംസ്ഥാനങ്ങളിലെ തീയേറ്ററുകളിലാണ് കേരളാ സർക്കാരിന്റെ നേട്ടങ്ങൾ പ്രദർശിപ്പിക്കുക. അഞ്ച് സംസ്ഥാനങ്ങളിലെ നഗരപ്രദേശങ്ങളിലുള്ള 100 തീയേറ്ററുകളിൽ സർക്കാർ നേട്ടം പ്രദർശിപ്പിക്കും. ഒന്നരമിനിറ്റ് ദൈർഘ്യമുള്ള വീഡിയോയാണ് പ്രദർശിപ്പിക്കുക. ഇതിനായി ഏജൻസിയെ കണ്ടെത്തുമെന്നാണ് വിവരം.
സാമ്പത്തികമായി അതിരൂക്ഷമായ പ്രതിസന്ധി നേരിടുന്ന കാലത്ത് സംസ്ഥാന സർക്കാരിന്റെ പരസ്യങ്ങൾക്കും നവകേരള സദസിന്റെ ഹോർഡിംഗുകൾ വക്കുന്നതിനും പണം ചെലവാക്കിയതിന് വലിയ രീതിയിൽ വിമർശനം നേരിട്ടിരുന്നു. പ്രതിസന്ധിയിലും ധൂർത്ത് നടത്തുകയാണെന്ന ആക്ഷേപം തുടരുന്നതിനിടെയാണ് വിമർശനങ്ങൾക്ക് പുല്ലുവില കൽപ്പിച്ച് വീണ്ടും സംസ്ഥാന സർക്കാർ അനാവശ്യം ചെലവ് നടത്തുന്നത്.
