കൊച്ചി: മറൈൻ ഡ്രൈവിലും പരിസര പ്രദേശങ്ങളിലും പൊലീസിന്റെ പരിശോധന. ഇതിന്റെ ദൃശ്യങ്ങൾ കേരളാ പൊലീസ് തന്നെയാണ് പങ്കുവച്ചിരിക്കുന്നത്. മറൈൻ ഡ്രൈവിലും സുഭാഷ് പാർക്കിന് സമീപവും എത്തിയിരിക്കുന്ന വിദ്യാർത്ഥികളോടും യുവതീ-യുവാക്കളോടും വിവരങ്ങൾ ആരാഞ്ഞതിന് ശേഷമാണ് പൊലീസ് മടങ്ങിയത്. എന്നാൽ വീഡിയോ പുറത്തുവന്നതോടെ സോഷ്യൽമീഡിയയിൽ രണ്ട് തരത്തിലുള്ള അഭിപ്രായങ്ങൾ ഉയരുകയാണ്.
സ്വകാര്യതയിലേക്കുള്ള കടന്നുകയറ്റമാണിതെന്നാണ് ഒരു കൂട്ടരുടെ വിമർശനം. കേരളാ പൊലീസ് സദാചാരം കളിക്കുകയാണെന്നും കേരളാ പൊലീസ് ഒളിഞ്ഞുനോട്ടം തുടങ്ങിയോയെന്നും ചിലർ കുറ്റപ്പെടുത്തി. പാർക്കിൽ വന്നിരിക്കുന്നവരുടെ പേരും മറ്റ് വിവരങ്ങളും ചോദിക്കേണ്ടതിന്റെ ആവശ്യമെന്താണെന്നും പൊതുസ്ഥലത്ത് എവിടെയും സമയം ചെലവഴിക്കാനുള്ള അവകാശം എല്ലാവർക്കുമുണ്ടെന്നിരിക്കെ പൊലീസ് ഇടയിൽ കയറുന്നത് എന്തിനാണെന്നും സോഷ്യൽ മീഡിയയിൽ പ്രതികരണങ്ങളയുർന്നു.
എന്നാൽ പൊലീസ് നടപടിയെ അഭിനന്ദിച്ചും പിന്തുണച്ചുമാണ് മറ്റൊരു വിഭാഗമെത്തിയത്. എല്ലായിടത്തും പൊലീസിന്റെ പട്രോളിംഗ് ഇത്തരത്തിൽ വേണമെന്നും ചിലർ ആവശ്യപ്പെട്ടു. സ്കൂൾ പരിസരം, ബസ് സ്റ്റാന്റുകൾ, പാർക്കുകൾ തുടങ്ങിയ സ്ഥലങ്ങളിൽ പൊലീസിന്റെ പരിശോധന തുടർച്ചയായി ഉണ്ടാകണമെന്നും ലഹരിമാഫിയകളുടെ ചതിക്കുഴികളിൽ നിന്നടക്കം വിദ്യാർത്ഥികളെ രക്ഷപ്പെടുത്താൻ പൊലീസിന്റെ ഇത്തരം ഇടപെടലുകൾക്ക് സാധിക്കുമെന്നും സോഷ്യൽമീഡിയയിൽ പ്രതികരണങ്ങൾ ഉയരുന്നുണ്ട്. പൊതുസ്ഥലങ്ങളിൽ മാന്യമായി പെരുമാറാൻ യുവതീ-യുവാക്കളെ പ്രേരിപ്പിക്കുന്നതിനും പൊലീസ് നിരീക്ഷണം സഹായകമാകുമെന്നും ചിലർ അഭിപ്രായപ്പെട്ടു. പരിസരം മറന്നുള്ള പ്രവർത്തനങ്ങൾക്ക് നിയന്ത്രണം വരുത്താനും പൊതുയിടങ്ങൾ എന്തും ചെയ്യാനുള്ള സ്ഥലമല്ലെന്ന് ബോധ്യപ്പെടുത്താനും പൊലീസ് നിരീക്ഷണം നല്ലതാണെന്നാണ് പ്രതികരണം.
