ദക്ഷിണേന്ത്യയിലെ സൂപ്പർ സ്റ്റാറെന്നാണ് നയൻതാരയെ ആരാധകർ വിശേഷിപ്പിക്കുന്നത്. അഭിനയത്തിലും സൗന്ദര്യത്തിലും നയൻതാരയെ വെല്ലാൻ മറ്റൊരാളില്ല. സൗന്ദര്യവും ആരോഗ്യവും സംരക്ഷിക്കുന്നതിന്റെ രഹസ്യമെന്തായിരിക്കുമെന്ന് ഒരിക്കെലങ്കിലും ചിന്തിക്കാത്തവരായി ആരുമുണ്ടാകില്ല. ദാ ഇപ്പോൾ നയൻതാര തന്നെ തന്റെ സൗന്ദര്യത്തിന്റെ രഹസ്യം വെളിപ്പെടുത്തി രംഗത്ത് വന്നിരിക്കുകയാണ്.
പോഷകാഹാരം സ്വീകരിച്ചതോടെ ജീവിതത്തിൽ വലിയ മാറ്റങ്ങൾ സംഭവിച്ചതായി നടി തുറന്നു സമ്മതിക്കുന്നു. നല്ല ഭക്ഷണക്രമമാണ് ആരോഗ്യകരവും സമ്പുഷ്ടവുമായ ജീവിതത്തിന്റെ രഹസ്യം. ശരീരഘടന നിലനിർത്തുകയാണ് പ്രധാനം. ഒരു അഭിനേതാവെന്ന നിലയിൽ തന്നെ സംബന്ധിച്ചിടത്തോളം സന്തുലിതാവസ്ഥ, സ്ഥിരത, ശരീരഘടന എന്നിവയിലാണ് ശ്രദ്ധ കേന്ദ്രീകരിക്കുന്നതെന്നും താരം ഇൻസ്റ്റഗ്രാം പോസ്റ്റിൽ പറയുന്നു.
ഇഷ്‍ടമില്ലാത്തത് കഴിക്കാതെ സ്വയം നിയന്ത്രിക്കുന്നതാണ് ഡയറ്റെന്നും താരം പറഞ്ഞു. കലോറി എണ്ണി ആഹാരം കഴിക്കുകയല്ല വേണ്ടതെന്നും പോഷകങ്ങൾ കണക്കാക്കി വ്യത്യസ്തയാർന്ന ഭക്ഷണം ശരിയായ അളവിൽ കഴിക്കുകയാണ് വേണ്ടതെന്ന് ഞാൻ മനസിലാക്കുന്നു. കുറച്ച് കാലത്തേക്ക് മാത്രമല്ല ഇത് തുടരേണ്ടതെന്നും മറിച്ച് ജീവിതത്തിന്റെ ഭാഗമാക്കി മാറ്റുകയാണ് വേണ്ടതെന്നും താരം കുറിപ്പിൽ പറഞ്ഞു.
ജങ്ക് ഫുഡ‍ിനോട് അമിതമായ കൊതിയില്ലെന്നും സന്തോഷത്തോടെയാണ് പോഷക സമൃദ്ധമായ ആഹാരം കഴിക്കുന്നതെന്നും അവർ പറഞ്ഞു. ഭക്ഷണത്തെ കാണുന്ന രീതി തന്നെ മാറിയെന്നും കൂടുതൽ ഊർജ്ജവും സന്തോഷവും ഇപ്പോൾ അനുഭവിക്കാൻ സാധിക്കുന്നു. തനിക്ക് ഇതിൽ നിന്ന് പ്രയോജനം ലഭിക്കുന്നുണ്ടെങ്കിൽ മറ്റുള്ളവർക്കും തീർച്ചയായും ലഭിക്കുമെന്നും അവർ കൂട്ടിച്ചേർത്തു.
വലിച്ചുവാരി കഴിക്കാതെ സമീകൃതാഹാരം കഴിക്കണമെന്നാണ് ആരോഗ്യ വിദഗ്ധർ അഭിപ്രായപ്പെടുന്നത്. ശരീരഭാരം നിയന്ത്രിക്കാനും അമിതവണ്ണത്തെ തടയാനും മറ്റ് ആരോഗ്യ പ്രശ്നങ്ങളെ തടയാനും ഇത് സഹായിക്കും. കൊളസ്ട്രോൾ, രക്തസമ്മർദ്ദം എന്നിവ കുറയ്‌ക്കാനും ഹൃദയാരോഗ്യത്തിനും സമീകൃതാഹാരം സഹായിക്കുന്നു. മാനസികാരോഗ്യത്തിനും പോഷക സമ്പന്നമായ ആഹാരം അനിവാര്യമാണ്.
