തിരുവനന്തപുരം: രാത്രി 10 മുതൽ വണ്ടികാത്ത് ഒറ്റയ്ക്കിരിക്കുന്ന സ്ത്രീകളെ സഹായിക്കാനായി പൊലീസ് ഹെല്പ് സെന്റർ സൗജന്യ യാത്രാപദ്ധതി ആരംഭിച്ചുവെന്ന വാർത്ത വ്യാജമെന്ന് കേരള പൊലീസ്. സമൂഹ മാദ്ധ്യമങ്ങളിൽ വ്യാജ വാർത്ത വലിയതോതിൽ പ്രചരിച്ചതിനെത്തുടർന്നാണ് വിശദീകരണവുമായി പൊലീസ് രംഗത്തെത്തിയത്. സംസ്ഥാന പൊലീസ് മീഡിയ സെന്റർ ഫേസ്ബുക്കിലൂടെ പങ്കുവച്ച കുറിപ്പിലാണ് വാർത്ത വ്യാജമാണെന്ന് വ്യക്തമാക്കിയത്.
“വർദ്ധിച്ചുവരുന്ന കുറ്റകൃത്യങ്ങൾ കണക്കിലെടുത്ത് രാത്രി 10 മുതൽ രാവിലെ 6 വരെ വീട്ടിലേക്ക് പോകാൻ വണ്ടി കത്ത് ഒറ്റയ്ക്കിരിക്കുന്ന ഏതൊരു സ്ത്രീക്കും പൊലീസ് ഹെല്പ് ലൈനുമായി ബന്ധപ്പെടാവുന്ന സൗജന്യ യാത്രാ പദ്ധതി കഴിഞ്ഞ ബുധനാഴ്ച മുതൽ ആരംഭിച്ചിട്ടുണ്ട്. ഒരു വാഹനം ആവശ്യപ്പെടുക. അവർ 24×7 മണിക്കൂറും പ്രവർത്തിക്കും” ഇതായിരുന്നു ഇതായിരുന്നു കേരളാ പൊലീസിന്റേതെന്ന തരത്തിൽ വ്യാപകമായി സമൂഹ മാദ്ധ്യമങ്ങളിൽ പ്രചരിച്ചത്. സന്ദേശത്തിനൊപ്പം ബന്ധപ്പെടാനുള്ള വ്യാജ ഹെല്പ് ലൈൻ നമ്പറും നൽകിയിരുന്നു.
എന്നാൽ ഈ സന്ദേശം പൂർണമായും വ്യാജമാണെന്ന് പൊലീസ് അറിയിച്ചു. ഇത്തരമൊരു അറിയിപ്പ് കേരള പൊലീസ് നൽകിയിട്ടില്ല. വ്യാജ വാർത്തകൾ നിർമ്മിക്കുന്നത് മാത്രമല്ല പ്രചരിപ്പിക്കുന്നതും കുറ്റകരമാണെന്ന് പൊലീസ് പങ്കുവച്ച പോസ്റ്റിൽ വ്യക്തമാക്കി. പ്രചരിച്ച പോസ്റ്റിന്റെ ചിത്രമുൾപ്പെടെ പോസ്റ്റ് ചെയ്താണ് വാർത്ത വ്യാജമാണെന്ന് പൊലീസ് അറിയിച്ചത്.
