തിരുവനന്തപുരം: സ്കൂട്ടറിൽ കറങ്ങി നടന്ന് മദ്യം വിറ്റ മദ്ധ്യവയസ്കൻ എക്സൈസ് പിടിയിൽ. കാഞ്ഞിരംകുളം സ്വദേശി സിന്ധുവെന്ന് വിളിപ്പേരുള്ള സിന്ധു കുമാർ (44) ആണ് പിടിയിലായത്. തിരുപുറത്ത് വച്ചാണ് ഇയാളെ ഉദ്യോഗസ്ഥർ പിടികൂടിയത്.
എക്സൈസിന് ലഭിച്ച രഹസ്യ വിവരത്തെ തുടർന്ന് നടത്തിയ പരിശോധനയിലാണ് ഇയാൾ പിടിയിലായത്. സിന്ധു കുമാറിൽ നിന്നും 11 ലിറ്റർ ഇന്ത്യൻ നിർമിത വിദേശ മദ്യം കണ്ടെടുത്തതായി എക്സൈസ് അറിയിച്ചു.
തിരുപുറം റേഞ്ച് അസിസ്റ്റന്റ് എക്സൈസ് ഇൻസ്പെക്ടർ ബിനുവിന്റെ നേതൃത്വത്തിൽ നടത്തിയ പരിശോധനയിൽ ഇയാൾ കുടുങ്ങുകയായിരുന്നു. മദ്യം വിൽക്കുന്നതിനായി ഉപയോഗിച്ച സ്കൂട്ടറും പ്രതിയേയും കസ്റ്റഡിയിലെടുത്തതായി ഉദ്യോഗസ്ഥർ പറഞ്ഞു.
