ബ്രസൽസ്: ബ്രസൽസ് ഡയമണ്ട് ലീഗ് ഫൈനലിൽ നേരിയ വ്യത്യാസത്തിന് ഒന്നാം സ്ഥാനം നഷ്ടമായി ഇന്ത്യയുടെ ജാവ്ലിൻ താരം നീരജ് ചോപ്ര. ഒന്നാം സ്ഥാനത്തെത്തിയ ഗ്രനേഡയുടെ ആൻഡേഴ്സൺ പീറ്റേഴ്സുമായി കേവലം 0.01 മീറ്റർ വ്യത്യാസത്തിലാണ് നീരജ് രണ്ടാമതായത്. നീരജ് 87.86 മീറ്റർ എറിഞ്ഞപ്പോൾ പീറ്റേഴ്സ് ആദ്യ ത്രോയിൽ 87.87 മീറ്റർ താണ്ടി.
86.82 മീറ്റർ എറിഞ്ഞായിരുന്നു നീരജിന്റെ തുടക്കം. രണ്ടാം അവസരത്തിൽ 83.49 മീറ്ററായി കുറഞ്ഞെങ്കിലും മൂന്നാമൂഴത്തിൽ നീരജ് ശക്തമായ തിരിച്ചുവരവ് നടത്തുകയായിരുന്നു. നാലാമൂഴത്തിൽ പീറ്റേഴ്സിനെ നീരജ് മറികടക്കുമെന്ന് തോന്നിപ്പിച്ചെങ്കിലും 82.04 മീറ്റർ മാത്രമാണ് എറിയാനായത്. രണ്ട് ഫൈനൽ അവസരങ്ങളിലും നീരജിന് ദൂരം മെച്ചപ്പെടുത്താനായില്ല. 83.30 മീറ്ററും 86.46 മീറ്ററുമായിരുന്നു എറിഞ്ഞത്.
ജർമ്മനിയുടെ ജൂലിയൻ വെബറാണ് മൂന്നാം സ്ഥാനത്ത് എത്തിയത്. 85.97 മീറ്ററാണ് ജൂലിയൻ എറിഞ്ഞത്. ആദ്യ ശ്രമത്തിൽ ഈ ദൂരം താണ്ടിയെങ്കിലും പിന്നീടുളള അവസരങ്ങളിൽ ജൂലിയൻ പിന്നോട്ടു പോയി. രണ്ടാം ഊഴത്തിൽ 82.61 മീറ്ററും മൂന്നാം അവസരത്തിൽ 82.15 മീറ്ററും നാലാമത് 81.46 മീറ്ററുമായിരുന്നു ജൂലിയൻ കുറിച്ച ദൂരം. മുൻ യൂറോപ്യൻ ചാമ്പ്യൻ കൂടിയാണ് ജൂലിയൻ.
ദോഹ ഡയമണ്ട് ലീഗോടെ ആയിരുന്നു നീരജ് ചോപ്ര ഈ സീസൺ ആരംഭിച്ചത്. 88.36 മീറ്റർ എറിഞ്ഞാണ് താരം അന്ന് രണ്ടാം സ്ഥാനത്ത് എത്തിയത്. 2022 ൽ ഡയമണ്ട് ലീഗിൽ ഒന്നാമത് എത്തിയ നീരജ് കഴിഞ്ഞ വർഷവും രണ്ടാം സ്ഥാനത്താണ് ഫിനീഷ് ചെയ്തത്. അടുത്തിടെ നടന്ന പാരീസ് ഒളിമ്പിക്സിലും നീരജ് വെളളി മെഡൽ നേടിയിരുന്നു. പാകിസ്താൻ താരം അർഷാദ് നദീമായിരുന്നു ഒളിമ്പിക്സിൽ സ്വർണം നേടിയത്. 89.94 മീറ്ററാണ് നീരജിന്റെ കരിയർ ബെസ്റ്റ് ദൂരം.
