തിരുവനന്തപുരം: വിഴിഞ്ഞം രാജ്യാന്തര തുറമുഖത്തിന് ഐഎസ്പിഎസ് (ഇന്റർ നാഷണൽ ഷിപ്പിങ് ആൻഡ് പോർട്ട് സെക്യൂരിറ്റി കോഡ്) അംഗീകാരം ലഭിച്ചു. മിനിസ്ട്രി ഓഫ് ഷിപ്പിങ് ആൻഡ് പോർട്ടിന്റെ കീഴിലുള്ള മറൈൻ മർച്ചന്റ് ഡിപ്പാർട്ട്മെന്റ് ആണ് സർട്ടിഫിക്കേഷൻ നൽകുന്നത്. ഇതോടെ വിഴിഞ്ഞം അന്തര്‍ദേശീയ സമുദ്ര വ്യാപാരത്തിനുള്ള സുരക്ഷിത ഇടമായി.
രാജ്യാന്തര കപ്പലുകൾക്ക് സർവീസിന് ഉപയോഗിക്കണമെങ്കിൽ ഐഎസ്പിഎസ് അംഗീകാരം ആവശ്യമാണ്. കഴിഞ്ഞ ഡിസംബറിൽ താൽക്കാലിക അംഗീകാരം ലഭിച്ചിരുന്നു. ഐക്യരാഷ്‌ട്ര സംഘടനയ്‌ക്കു കീഴിലുള്ള ഇന്റർനാഷനൽ മാരിടൈം ഓർഗനൈസേഷൻ നിർദ്ദേശിക്കുന്ന മാനദണ്ഡങ്ങൾ വിഴിഞ്ഞം പൂർത്തിയാക്കിയതോടെയാണ് കേന്ദ്രസർക്കാർ സർട്ടിഫിക്കേഷൻ നൽകിയത്. 2029 വരെയാണ് സുരക്ഷ സര്‍ട്ടിഫിക്കേഷന്‍ കാലാവധി. വിഴിഞ്ഞം തുറമുഖം പൂർണ തോതിൽ പ്രവർത്തനസജ്ജമാക്കുന്നതിന്റെ പ്രധാന ചുവടുവെപ്പാണ് ഇത്.
തുറമുഖത്ത് നങ്കൂരമിടാനുള്ള സൗകര്യങ്ങളും സുരക്ഷാ മാനദണ്ഡങ്ങളും പരിശോധിച്ച ശേഷമാണ് ഐഎസ്പിഎസ് അംഗീകാരം ലഭിക്കുന്നത്. ഇതോടെ കാർഗോ അതിവേഗ ക്രാഫ്റ്റ്, ബൾക്ക് കാരിയർ, ചരക്ക് കപ്പൽ എന്നിവയ്‌ക്കും വിഴിഞ്ഞത്തു നങ്കൂരമിടാം.
