ആലപ്പുഴ: ക്ഷേത്രത്തിലെ കാണിക്കവഞ്ചി മോഷ്ടിച്ച ഇരത സംസ്ഥാന തൊഴിലാളി പിടിയിൽ. ഡൽഹി ശ്രീനിവാസപുരി തൈമുർ സ്വദേശി മുഹമ്മദ് ബാബു (31) ആണ് പിടിയിലായത്. ആറാട്ടുപുഴ മംഗലം കുറിച്ചിക്കൽ കുടുംബ ക്ഷേത്രത്തിലെ കാണിക്കവഞ്ചിയാണ് ഇയാൾ മോഷ്ടിച്ചത്.
സെപ്തംബർ 11-നായിരുന്നു മോഷണം. ആക്രി ശേഖരിക്കാനെന്ന വ്യാജേന ഇയാൾ ക്ഷേത്രത്തിലെത്തുകയായിരുന്നു. തുടർന്ന് ഉപദേവതാ ക്ഷേത്രങ്ങളുടെ മുൻപിലുണ്ടായിരുന്ന കാണിക്കവഞ്ചി മോഷ്ടിച്ച് കടന്നുകളഞ്ഞു.
ക്ഷേത്രം അധികൃതർ പൊലീസിൽ പരാതിപ്പെട്ടതിനെ തുടർന്ന് സിസിടിവി ദൃശ്യങ്ങളുടെ അടിസ്ഥാനത്തിൽ പ്രതിക്കായുള്ള തെരച്ചിൽ നടന്നിരുന്നു. ഇതിനിടെ ഇയാളെ ആലപ്പുഴയിൽ നിന്നും പിടികൂടുകയായിരുന്നുവെന്ന് പൊലീസ് പറഞ്ഞു.
