മലയാളം, തമിഴ്, തെലുങ്ക് സിനിമകളിലൂടെ പ്രശസ്തയായ നടി വനിത വിജയ കുമാർ നാലാമതും വിവാഹിതയാകുന്നുവെന്ന വാർത്ത അടുത്തിടെയാണ് സമൂഹമാദ്ധ്യമങ്ങളിൽ തരംഗം സൃഷ്ടിച്ചത്. നടനും നൃത്ത സംവിധായകനുമായ റോബർട്ട് മാസ്റ്ററാണ് വരൻ എന്ന തരത്തിലായിരുന്നു വാർത്ത പരന്നത്. ഒക്ടോബർ 5, സേവ് ദ ഡേറ്റ് എന്നെഴുതിയ ചിത്രം വനിത ഇൻസ്റ്റഗ്രാമിലൂടെ പങ്കുവച്ചതാണ് സമൂഹമാദ്ധ്യമങ്ങൾ ഏറ്റെടുത്തത്.
എന്നാൽ ആ തീയതിക്ക് പിന്നിൽ ഒളിപ്പിച്ച വമ്പൻ ട്വിസ്റ്റ് ഇപ്പോൾ പുറത്തുവിട്ടിരിക്കുകയാണ് വനിത വിജയകുമാർ. ഇരുവരുടെയും വിവാഹ ചിത്രങ്ങൾ കാണാനെത്തിയ ആരാധകരെ ഞെട്ടിച്ചു കൊണ്ട് വനിത സംവിധാനം ചെയ്യുന്ന പുതിയ ചിത്രത്തിന്റെ പ്രമോഷനാണ് താരം പുറത്തുവിട്ടത്. വനിതയും റോബർട്ടും അഭിനയിക്കുന്ന മിസ്റ്റർ ആൻഡ് മിസിസിന്റെ പോസ്റ്ററും താരം പങ്കുവച്ചു. മകൾ ജോവികയാണ് ചിത്രത്തിന്റെ നിർമാതാവ്. ശ്രീകാന്ത് ദേവയാണ് ചിത്രത്തിന്റെ സംഗീതം.
ഏതാനും ദിവസങ്ങൾക്ക് മുമ്പാണ് റോബർട്ടുമായുള്ള ചിത്രം വനിത പോസ്റ്റ് ചെയ്തത്. എന്നാൽ ഇരുവരുടെയും വിവാഹത്തെ കുറിച്ച് താരം പ്രതികരിച്ചിരുന്നില്ല. ചിത്രങ്ങൾ വൈറലായതിന് പിന്നാലെ താരത്തെ വിമർശിച്ചും അനുകൂലിച്ചും നിരവധി പേർ രംഗത്തെത്തിയിരുന്നു.
