ദുർഗാദേവിക്ക് പ്രധാനമന്ത്രിയുടെ സമർപ്പണം; നവരാത്രി വേളയിൽ രചിച്ച ‘ഗർബ’ ഗാനം പങ്കുവച്ച് മോദി

ന്യൂഡൽഹി: നവരാത്രി ആഘോഷങ്ങൾക്ക് മാറ്റുകൂട്ടി ദുർഗാ ദേവിക്ക് സമർപ്പണമായി രചിച്ച ഗർബ ഗാനം പങ്കുവച്ച് പ്രധാനമന്ത്രി നരേന്ദ്ര മോദി. എക്‌സിൽ പങ്കുവച്ച പോസ്റ്റിലൂടെയാണ് മോദി രചിച്ച് ഗായിക പൂർവ മന്ത്രി ഈണം നൽകിയ ഗാനം പ്രധാനമന്ത്രി പങ്കുവച്ചത്. ‘ആവതി കലായ്’ എന്ന ഗർബാ ഗാനം ദുർഗാ ദേവിയുടെ ശക്തിക്കും കൃപയ്‌ക്കും മുന്നിൽ സമർപ്പിക്കുന്നുവെന്ന് മോദി എക്‌സിൽ പങ്കുവച്ച പോസ്റ്റിൽ പറഞ്ഞു.

“നവരാത്രിയുടെ ശുഭകരമായ ഈ വേള ആളുകൾ വ്യത്യസ്തമായ രീതിയിൽ ആഘോഷിക്കുന്നു. എല്ലാവരും ദുർഗാദേവിയോടുള്ള അവരുടെ ഭക്തിയിൽ ഐക്യപ്പെടുന്നു. ഭക്തിയുടെയും ആനന്ദത്തിന്റെയും വേളയിൽ ഞാൻ രചിച്ച ‘ആവതി കലായ്’ എന്ന ഗർബാ ഗാനം ദേവിയുടെ ശക്തിക്കും കൃപയ്‌ക്കും മുന്നിൽ സമർപ്പിക്കുന്നു. ദേവിയുടെ അനുഗ്രങ്ങൾ എപ്പോഴും നമുക്കുണ്ടാവട്ടെ,” ഗാനത്തിന്റെ വീഡിയോ പങ്കിട്ടുകൊണ്ട് മോദി എക്‌സിൽ കുറിച്ചു.

It is the auspicious time of Navratri and people are celebrating in different ways, united by their devotion to Maa Durga. In this spirit of reverence and joy, here is #AavatiKalay, a Garba I wrote as a tribute to Her power and grace. May Her blessings always remain upon us. pic.twitter.com/IcMydoXWoR

— Narendra Modi (@narendramodi) October 7, 2024

തന്റെ ഗർബാ ഗാനം ആലപിച്ചതിനും സ്വരമാധുര്യത്തോടെ അവതരിപ്പിച്ചതിനും അദ്ദേഹം ഗായിക പൂർവ മന്ത്രിയോട് നന്ദി പറഞ്ഞു. അവർ ഒരു പ്രതിഭാധനയായ ഗായികയാണെന്നും പ്രധാനമന്ത്രി കൂട്ടിച്ചേർത്തു. ഗുജറാത്തിലെ ഒരു നാടോടി നൃത്തരൂപമായ ഗർബ നവരാത്രി ഉത്സവ വേളയിൽ ഏറെ പ്രാധാന്യമുള്ളതാണ്. 2023 ഡിസംബറിൽ യുനെസ്‌കോയുടെ പൈതൃകപ്പട്ടികയിലും ഗർബ ഇടം നേടിയിരുന്നു. കഴിഞ്ഞ വർഷവും നവരാത്രി ആഘോഷങ്ങളുടെ ഭാഗമായി മോദി താൻ രചിച്ച ഗർബാ ഗാനം പങ്കുവച്ചിരുന്നു.