തിരുവോണം ബമ്പർ വിജയിയെ കണ്ടെത്തി. കർണാടക സ്വദേശി അൽത്താഫിനെയാണ് ഭാഗ്യദേവത കടാക്ഷിച്ചിരിക്കുന്നത്. കഴിഞ്ഞ മാസം ബത്തേരിയിൽ നിന്നാണ് അൽത്താഫ് ടിക്കറ്റെടുത്തത്.
മക്കളുടെ വിവാഹം നടത്തണം, സ്വന്തമായി വീട് പണിയണം എന്നാണ് അൽത്താഫിന്റെ ആഗ്രഹം. കഴിഞ്ഞ 15 വർഷമായി സ്ഥിരമായി ലോട്ടറിയെടുക്കുന്നയാളാണ് താനെന്ന് മെക്കാനിക്കായ അൽത്താഫ് പറയുന്നു. TG434222 നമ്പറിലുള്ള ടിക്കറ്റിനാണ് ഒന്നാം സമ്മാനമായ 25 കോടിയുടെ സമ്മാനം ലഭിച്ചത്. സുൽത്താൻ ബത്തേരിയിലെ എംജി റോഡ‍ിലെ നാഗരാജിന്റെ ലോട്ടറി കടയിൽ നിന്നാണ് ടിക്കറ്റ് വിറ്റുപോയത്.
കഴിഞ്ഞ വർഷവും തിരുവോണം ബമ്പർ അടിച്ചത് അയൽസംസ്ഥാനത്തായിരുന്നു. പാലക്കാട് നിന്നെടുത്ത ടിക്കറ്റിനായിരുന്നു സമ്മാനം. തമിഴ്നാട് സ്വദേശികളായ പാണ്ഡ്യരാജ്, നടരാജൻ, കുപ്പുസ്വാമി, രംഗസ്വാമി എന്നിവർക്കാണ് 25 കോടി അടിച്ചത്.
