ബേബി എന്ന തെലുങ്ക് ചിത്രത്തിലൂടെ ശ്രദ്ധേയനായ നടൻ നിതിനെ മാലപൊട്ടിക്കലിന് അറസ്റ്റ് ചെയ്തു. രണ്ടുപേർ ചേർന്നാണ് ഇയാളെ പിടിച്ചുപറിക്കിടെ പിടികൂടിയത്. നടനാണെന്ന കാര്യം ടൈംസ് ഓഫ് ഇന്ത്യയാണ് വെളിപ്പെടുത്തിയത്. സ്ത്രീ ബഹളംവച്ചതോടെയാണ് പ്രതിയെ യുവാക്കൾ ഓടിച്ചിട്ട് പിടികൂടിയത്. പിന്നീട് നിതിനെ പൊലീസിന് കൈമാറി. ശിവ, തേജ എന്നീ യുവാക്കളെ പൊലീസ് പിന്നീട് അനുമോദിച്ചു.മൈത്രിവനം റോഡിലെ സാരഥി സ്റ്റുഡിയോക്ക് സമീപമായിരുന്നു സംഭവം. 20-കാരി ബസിന് കാത്തിരിക്കുകയായിരുന്നു. ഇതിനിടെ പ്രതി ഇവരുടെ മാല പൊട്ടിച്ച് ഓടി.
ഇതോടെ ഇവർ നിലവിളിച്ച് ,പിന്നാലെ പാഞ്ഞു. വഴിയാത്രക്കാരായ യുവാക്കൾ പ്രതിയെ പിന്തുടർന്ന് പിടികൂടുകയായിരുന്നു. മധുരനഗർ പൊലീസ് പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ഡിസിപി വിജയകുമാറാണ് യുവാക്കളെ അനുമോദിച്ചത്. 2023-ൽ പുറത്തിറങ്ങിയ ഹിറ്റ് ചിത്രമാണ് ബേബി. ആനന്ദ് ദേവരകൊണ്ട വൈഷ്ണവി ചൈതന്യ എന്നിവർ കേന്ദ്ര കഥാപാത്രമായ ചിത്രം ബോക്സോഫീസിലും തരംഗമായിരുന്നു.
