കോട്ടയം: പുതുപ്പള്ളിയിൽ വീട്ടിൽ ഉറങ്ങിക്കിടന്ന കുഞ്ഞിനെ തട്ടിക്കൊണ്ടുപോകാൻ ശ്രമം. 6 മാസം പ്രായമുള്ള കുഞ്ഞിനെയാണ് നാടോടി സ്ത്രീകൾ തട്ടിക്കൊണ്ടുപോകാൻ ശ്രമിച്ചത്. ഇന്ന് രാവിലെയാണ് സംഭവം. അമ്മയുടെ സമയോചിതമായ ഇടപെടലിലൂടെ കുട്ടിയെ രക്ഷിക്കുകയായിരുന്നു.
ഒരാഴ്ച മുൻപും നാടോടി സ്ത്രീകൾ വീടിന്റെ പരിസരത്ത് എത്തിയിരുന്നതായി കുഞ്ഞിന്റെ അമ്മ പറഞ്ഞു. കഴിഞ്ഞ ദിവസം വീട്ടിലെത്തിയ നാടോടി സ്ത്രീകൾ കുട്ടിയെയും വീടും പരിസരവും നോക്കി വയ്‌ക്കുകയായിരുന്നു. തുടർന്ന് ഇന്ന് ഇവർ വീണ്ടും വീട്ടിലേക്കെത്തി.
പരിസരങ്ങളിൽ ആരും ഇല്ലെന്ന് ഉറപ്പു വരുത്തിയ ഇവർ വീട്ടിനുള്ളിൽ കയറി ഉറങ്ങി കിടന്ന കുഞ്ഞിനെയും എടുത്ത് കടന്നുകളയാൻ ശ്രമിച്ചു. ഇത് ശ്രദ്ധയിപ്പെട്ട അമ്മ ഇവർക്ക് പിന്നാലെ ഓടി കുഞ്ഞിനെ രക്ഷപ്പെടുത്തുകയായിരുന്നു.
രണ്ട് സ്ത്രീകളാണ് കുഞ്ഞിനെ തട്ടിയെടുക്കാൻ ശ്രമിച്ചത്. ഇവർ രക്ഷപ്പെട്ടതായി അമ്മ പറഞ്ഞു. സംഭവത്തിൽ മൂന്ന് പേരെ കസ്റ്റഡിയിലെടുത്ത് ചോദ്യം ചെയ്ത് വരികയാണെന്നും പൊലീസ് പറഞ്ഞു.
