ബെംഗലൂരു: പരിക്കിന്റെ പിടിയിൽ നിന്ന് പൂർണമായി മുക്തനാകാത്ത പേസർ മുഹമ്മദ് ഷമിക്ക് ഓസ്‌ട്രേലിയൻ പര്യടനവും നഷ്ടമാകും. ബോർഡർ ഗവാസ്‌കർ പരമ്പരയ്‌ക്കായിട്ടാണ് അടുത്ത മാസം ഇന്ത്യൻ ടീം ഓസ്‌ട്രേലിയയിലേക്ക് പോകുന്നത്.
കരിയറിലുടനീളം വേട്ടയാടിയ കാൽമുട്ടിലെ പരിക്കിന് താരം ഇപ്പോഴും ചികിത്സയിലാണ്. പരിക്ക് ഭേദമായാലും ഷമിയെ ഓസ്‌ട്രേലിയൻ പര്യടനത്തിൽ ഉൾപ്പെടുത്തുന്നത് എളുപ്പമല്ലെന്ന് രോഹിത് ശർമ്മ ചൂണ്ടിക്കാട്ടി. നാഷണൽ ക്രിക്കറ്റ് അക്കാദമിയിൽ ഡോക്ടർമാരുടെയും ഫിസിയോകളുടെയും നിരീക്ഷണത്തിലാണ് ഷമി.
ഫിസിയോസും ട്രെയിനർമാരും ഡോക്ടർമാരും ഷമിക്ക് മുൻപിൽ കൃത്യമായ പ്ലാൻ അവതരിപ്പിച്ചിട്ടുണ്ട്. 100 ശതമാനം ശാരീരിക ക്ഷമത വീണ്ടെടുത്ത ഷമിയെയാണ് പ്രതീക്ഷിക്കുന്നതെന്നും ക്യാപ്റ്റൻ പറഞ്ഞു. 2023 ലെ ക്രിക്കറ്റ് ലോകകപ്പിന് ശേഷം ഷമി മത്സരത്തിന് ഇറങ്ങിയിട്ടില്ല. അതുകൊണ്ടു തന്നെ ഷമിയെ ഈ അവസ്ഥയിൽ ഓസ്‌ട്രേലിയൻ പര്യടനത്തിൽ ഉൾപ്പെടുത്താനാകില്ലെന്നും രോഹിത് ശർമ്മ പറഞ്ഞു.
ദേശീയ ടീമിലേക്ക് മടങ്ങിയെത്തും മുൻപ് ഷമി പൂർണമായി ആരോഗ്യക്ഷമത വീണ്ടെടുക്കണമെന്നാണ് മാനേജ്‌മെന്റിന്റെ താൽപര്യമെന്നും രോഹിത് ശർമ്മ പറഞ്ഞു. ഷമി 100 ശതമാനവും ആരോഗ്യം വീണ്ടെടുക്കണം. പകുതി ആരോഗ്യം വീണ്ടെടുത്ത ഷമിയെ ടീമിൽ ഉൾപ്പെടുത്തുന്നത് ശരിയായ തീരുമാനമായിരിക്കില്ലെന്നും രോഹിത് ശർമ്മ പറഞ്ഞു. ബംഗലൂരുവിൽ ന്യൂസിലൻഡിനെതിരായ ടെസ്റ്റ് മത്സരത്തിന് മുന്നോടിയായി മാദ്ധ്യമങ്ങളെ കണ്ടപ്പോഴാണ് രോഹിത് ശർമ്മ ഇക്കാര്യം സ്ഥിരീകരിച്ചത്.
ഏറെക്കാലം മത്സരങ്ങൾ കളിക്കാതിരുന്ന ഒരു ഫാസ്റ്റ് ബൗളറെ സംബന്ധിച്ച് പെട്ടന്ന് അതിൽ നിന്ന് പുറത്തുവന്ന് മികച്ച പ്രകടനം പുറത്തെടുക്കുകയെന്നത് പ്രായോഗികമല്ലെന്നും രോഹിത് ശർമ്മ ചൂണ്ടിക്കാട്ടി. നാഷണൽ ക്രിക്കറ്റ് അക്കാദമി ഷമിയുടെ ആരോഗ്യത്തിൽ പ്രത്യേക ശ്രദ്ധ പതിപ്പിക്കുന്നുണ്ട്. ആഭ്യന്തര മത്സരങ്ങളിലൂടെ ഷമി ആരോഗ്യക്ഷമത തെളിയിക്കേണ്ടി വരുമെന്നും രോഹിത് ശർമ്മ പറഞ്ഞു.
നവംബർ 22 മുതലാണ് ബോർഡർ ഗവാസ്‌കർ ട്രോഫി നടക്കുന്നത്. അഞ്ച് ടെസ്റ്റുകളാണ് പരമ്പരയിൽ ഉളളത്. ഡിസംബർ അവസാനത്തോടെയാണ് പൂർത്തിയാകുക.
