ചെന്നൈ: നടൻ വിജയ്‌യുടെ പാർട്ടിയായ തമിഴക വെട്രി കഴകത്തിന്റെ പതാകയിൽ നിന്ന് ആനയുടെ ചിഹ്നം മാറ്റണമെന്ന് ആവശ്യപ്പെട്ട് ബിഎസ്പി തമിഴ്‌നാട് യൂണിറ്റ്. സംഭവത്തിൽ വിജയ്‌ക്ക് വക്കീൽ നോട്ടീസ് അയച്ചതായും ബിഎസ്പി തമിഴ്‌നാട് ഘടകം അറിയിച്ചു. ബിഎസ്പിയുടെ ചിഹ്നമാണ് ആനയെന്നും അഞ്ച് ദിവസത്തിനകം പതാകയിൽ നിന്ന് ചിഹ്നം മാറ്റണമെന്നും ആവശ്യപ്പെട്ടാണ് നോട്ടീസ് അയച്ചത്.
പതാകയിൽ നിന്ന് ചിഹ്നം മാറ്റാൻ തയ്യാറല്ലെങ്കിൽ നിയമ നടപടി നേരിടേണ്ടി വരുമെന്നും ബിഎസ്പി മുന്നറിയിപ്പ് നൽകി. ഓഗ്‌സ്റ്റ് 22 ന് പാതക പുറത്തിറക്കിയപ്പോൾ തന്നെ ആനയുടെ ചിഹ്നം ഉപയോഗിച്ചതിൽ കടുത്ത വിയോജിപ്പ് അറിയിച്ചിരുന്നുവെന്നും ബിഎസ്പി വ്യക്തമാക്കി. പതാകയുമായി ബന്ധപ്പെട്ട് തെരഞ്ഞെടുപ്പ് കമ്മീഷനെ സമീപിച്ചിരുന്നെങ്കിലും കൊടികളുടെ കാര്യത്തിൽ ഇടപെടാനാകില്ലെന്നായിരുന്നു മറുപടി.
ഓഗസ്റ്റ് 22ന് പനയൂരിലെ പാർട്ടി ആസ്ഥാനത്ത് നടന്ന ചടങ്ങിലാണ് വിജയ് പതാക പുറത്തിറക്കിയത്. ചുവപ്പും മഞ്ഞയും ചേർന്നതാണ് പതാക. ഇതിന് ഇരുവശത്തായി രണ്ട് ആനയും വാകപ്പൂവുമുണ്ട്. എന്നാൽ പതാകയിൽ ആനയുടെ ചിഹ്നം ഉപയോഗിച്ചതിൽ നേരത്തെയും പരാതികൾ ഉയർന്നിരുന്നു.
