പാലക്കാട്: ലോകപ്രശസ്തമായ കൽപ്പാത്തി രഥോത്സവത്തിന് ഇന്ന് കൊടിയേറും. കേന്ദ്രസ്ഥാനമായ കല്പാത്തി വിശാലാക്ഷീസമേത വിശ്വനാഥസ്വാമി ക്ഷേത്രത്തിലും പുതിയ കല്പാത്തി മന്തക്കര മഹാഗണപതി ക്ഷേത്രത്തിലും പഴയ കല്പാത്തി ലക്ഷ്മീനാരായണപെരുമാൾ ക്ഷേത്രത്തിലും ചാത്തപുരം പ്രസന്നമഹാഗണപതി ക്ഷേത്രത്തിലുമാണ് വേദമന്ത്രജപങ്ങളോടെ കൊടിയേറ്റം നടക്കുക
വിശാലാക്ഷീസമേത വിശ്വനാഥസ്വാമി ക്ഷേത്രത്തിൽ രാവിലെ 11-നും 12-നുമിടയിലാണ് കൊടിയേറ്റം. രാവിലെ ഏഴുമുതൽ വേദപാരായണം, വൈകീട്ട് യാഗശാലപൂജ, അഷ്ടബലി, ഗ്രാമപ്രദക്ഷിണം എന്നിവയുമുണ്ട്.
പുതിയ കല്പാത്തിയിൽ രാവിലെ എട്ടിന് നാല് വേദങ്ങളുടെയും പാരായണമാരംഭിക്കും. 10.15-നും 11-നുമിടയിലാണ് കൊടിയേറ്റം. പഴയ കല്പാത്തിയിൽ രാവിലെ ഏഴിന് കളഭാഭിഷേകത്തിനുശേഷം എട്ടിന് വേദപാരായണം ആരംഭിക്കും. രാവിലെ 10.30-നും 11-നുമിടയിലാണ് ധ്വജാരോഹണം. വൈകീട്ട് കാളിയമർദന അലങ്കാരത്തിലാണ് പെരുമാളെ എഴുന്നള്ളിക്കുക. ചാത്തപുരം പ്രസന്നമഹാഗണപതി ക്ഷേത്രത്തിൽ രാവിലെ 10.30 നാണ് കൊടിയേറ്റം.
ഒന്നാം തേര് നാളായ 13 ന് രാവിലെ നടക്കുന്ന രഥാരോഹണത്തിന് ശേഷം വൈകീട്ട് രഥപ്രയാണം ആരംഭിക്കും. നവംബർ 15 നാണ് ദേവാരാധ സംഗമം. കല്‍പ്പാത്തി രഥോത്സവം സുഗമമായി നടത്തുന്നതിന് ആവശ്യമായ എല്ലാ സജ്ജീകരണങ്ങളും ഒരുക്കുമെന്ന് ജില്ലാ കളക്ടര്‍ അറിയിച്ചു.
