ബദാം, കശുവണ്ടി, പിസ്ത, വാൽനട്ട് തുടങ്ങിയവയിൽ ഇഷ്ടമുള്ളത് തെരഞ്ഞെടുക്കാനുള്ള അവസരം നൽകിയാൽ ഏതായിരിക്കും നിങ്ങൾ തെരഞ്ഞെടുക്കുക? മിക്കവരും വാൽനട്ടിനെ ഒഴിവാക്കാൻ ശ്രമിച്ചെന്ന് വരും. വാൽനട്ടിന്റെ ചവർപ്പ് ഇഷ്ടപ്പെടാത്തവരായിരിക്കും ഇതിനെ ഒഴിവാക്കുന്നവരിൽ ബഹുഭൂരിപക്ഷവും. എന്നാൽ ചവച്ചരയ്ക്കാൻ ഇഷ്ടമില്ലെങ്കിൽ എണ്ണയായി ഉപയോഗിച്ചോളൂ..
ഹൃദയാരോഗ്യം വർദ്ധിപ്പിക്കുന്നു
ഒമേഗ-3 ഫാറ്റി ആസിഡുകൾ ധാരാളം അടങ്ങിയിട്ടുള്ള ഭക്ഷ്യവസ്തുവാണ് വാൽനട്ട്. ഇതിൽ അടങ്ങിയിരിക്കുന്ന പോഷക ഘടകങ്ങൾ കോർട്ടിസോളിന്റെ അളവ് നിയന്ത്രിച്ച് സമ്മർദ്ദം കുറയ്ക്കാൻ സഹായിക്കുന്നു. ആന്റി ഓക്സിഡന്റ് ഘടകങ്ങൾ ധാരാളം അടങ്ങിയിട്ടുള്ളതിനാൽ ഹൃദയാരോഗ്യം മെച്ചപ്പെടുകയും ഹൃദ്രോഗങ്ങൾ തടഞ്ഞു നിർത്തുകയും ചെയ്യുന്നു. ഇതിനു പുറമെ തലച്ചോറിന്റെ പ്രവർത്തനങ്ങൾ മെച്ചപ്പെടുത്തുന്നതിനും വാൽനട്ട് ഓയിൽ ഉപയോഗിക്കാം.
തിളക്കമാർന്ന ചർമ്മത്തിന്
വിറ്റാമിൻ ഇ ധാരാളം അടങ്ങിയ വാൽനട്ട് ഓയിൽ ചർമ്മത്തിന്റെ തിളക്കം വർദ്ധിക്കുന്നു. ഈർപ്പം നിലനിർത്തുന്നതിനും ചർമ്മം മൃദുവാകുന്നതിനും ഈ എണ്ണ സഹായിക്കും.
ചർമ്മകാന്തി വർദ്ധിപ്പിക്കുന്നതിന് പുറമെ മുടിയുടെ ആരോഗ്യം വർദ്ധിപ്പിക്കുന്നതിനും വാൽനട്ട് ഓയിൽ സഹായിക്കുന്നു. വാൽനട്ട് ഓയിൽ ശിരോചർമ്മത്തിൽ പുരട്ടിയ ശേഷം നന്നായി മസാജ് ചെയ്ത് കൊടുക്കുക. ശേഷം ഇത് കഴുകി കളയാവുന്നതാണ്.
പ്രമേഹം കുറയ്ക്കുന്നതിന്
പ്രമേഹ രോഗികൾക്ക് കഴിക്കാവുന്ന ഉത്തമ ഭക്ഷണമാണ് വാൽനട്ട്. രക്തത്തിലെ പഞ്ചാരയുടെ അളവ് നിയന്ത്രിക്കാൻ ഇത് സഹായിക്കുന്നു. ടൈപ്പ് 2 പ്രമേഹം വരാനുള്ള സാധ്യതകളും ഇത് കുറയ്ക്കുന്നു.
എല്ലുകളുടെയും പല്ലുകളുടെയും ആരോഗ്യത്തിന്
വാൽനട്ടിൽ മഗ്നീഷ്യം ധാരാളം അടങ്ങിയിരിക്കുന്നു. എല്ലുകളുടെയും പല്ലുകളുടെയും ബലത്തിന് മഗ്നീഷ്യവും കാത്സ്യവും ആവശ്യമാണ്. ശരീരത്തിനാവശ്യമായ മറ്റ് ധാതുക്കളും വാൽനട്ട് പ്രദാനം ചെയ്യുന്നു.
