പറ്റ്ന: ബിഹാറിലെ ദർഭംഗയിൽ നിർമിക്കുന്ന ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിന്റെ നിർമ്മാണോദ്ഘാടനം പ്രധാനമന്ത്രി നരേന്ദ്രമോദി നിർവഹിച്ചു. ഇതോടോപ്പം 12,000 കോടി രൂപയുടെ വികസന പദ്ധതികൾക്കും അദ്ദേഹം തുടക്കം കുറിച്ചു.
കർപ്പൂരി ഠാക്കൂറിന്റെ സ്വപ്നങ്ങൾ സാക്ഷാത്കരിക്കുന്നത് കേന്ദ്രസർക്കാർ പ്രതിജ്ഞാബദ്ധമാണെന്ന് പ്രധാനമന്ത്രി പറഞ്ഞു. കുടുംബത്തിലെ ഒരംഗത്തിന് അസുഖം വന്നാൽ തന്നെ കുടുംബത്തിന്റെ താളം തെറ്റും. സമാന സാമൂഹിക പശ്ചാത്തലത്തിൽ നിന്നുള്ള തനിക്ക് ഇത് മനസ്സിലാകുമെന്ന് പ്രധാനമന്ത്രി ചൂണ്ടിക്കാട്ടി.
ജനങ്ങളുടെ ആരോഗ്യത്തിന് പ്രഥമ പരിഗണനയാണ് സർക്കാർ നൽകുന്നത്. രാജ്യത്തെ എയിംസ് ആശുപത്രികളുടെ എണ്ണം 24 ആയി വർദ്ധിച്ചു. കഴിഞ്ഞ പത്ത് വർഷം കൊണ്ട് ഒരു ലക്ഷം മെഡിക്കൽ സീറ്റുകളാണ് പുതിയതായി കൂട്ടിച്ചേർത്തത്. അടുത്ത അഞ്ച് വർഷത്തിനുള്ളിൽ 75,000 പുതിയ മെഡിക്കൽ സീറ്റുകൾ കൂടി അനുവദിക്കും. ഹിന്ദിയിലും മറ്റ് പ്രാദേശിക ഭാഷകളിലും മെഡിക്കൽ വിദ്യാഭ്യാസം നൽകാൻ പദ്ധതിയുണ്ടെന്നും പ്രധാനമന്ത്രി കൂട്ടിച്ചേർത്തു
1,260 കോടി രൂപയാണ് ദർഭംഗയിൽ എയംസിനായി കേന്ദ്രസർക്കാർ വകയിരുത്തിയിരിക്കുന്നത്. സൂപ്പർ സ്പെഷ്യാലിറ്റി ആശുപത്രി, ആയുഷ് ബ്ലോക്ക്, മെഡിക്കൽ കോളേജ്, നഴ്സിംഗ് കോളേജ്, നൈറ്റ് ഷെൽട്ടർ, പാർപ്പിടങ്ങൾ എന്നിവ അടക്കം ബൃഹത് പദ്ധതിയാണ് ആസൂത്രണം ചെയ്തിരിക്കുന്നത്.
