പൊതുവെ എല്ലാവരെയും അലട്ടുന്നൊരു പ്രധാന പ്രശ്നമാണ് തലമുടിയിലെ താരൻ. എത്ര ചീകി വൃത്തിയാക്കി വച്ചാലും മുടിക്ക് മുകളിൽ മണൽ വിതറിയത് പോലെ താരൻ പുറത്തുകാണും. താരനെ അകറ്റാൻ ആയുർവേദവും ഇംഗ്ലീഷ് മരുന്നുകളുമെല്ലാം പരീക്ഷിച്ച് മടുത്തവരാകും നമ്മളിൽ പലരും. താരൻ കൂടിയാൽ പല അലർജികൾ ഉണ്ടാകാനും കാരണമായേക്കാം. നെറ്റിയിലും കഴുത്തിലുമൊക്കെ താരൻ പടരാനുള്ള സാധ്യകളും ഏറെയാണ്. എന്നാൽ ഒറ്റ ദിവസം കൊണ്ട് താരനെ പൂർണമായും ഇല്ലാതാക്കാൻ ഒരു ഒറ്റമൂലിയുണ്ട്. പലരും പരീക്ഷിക്കാൻ മടിക്കുന്ന ഒരു പൊടിക്കൈ. മുടി തഴച്ചുവളരണമെന്ന് ആഗ്രഹിക്കുന്ന എല്ലാവർക്കും ഇതൊന്ന് പരീക്ഷിച്ചുനോക്കാവുന്നതാണ്.
അനായാസം തയാറാക്കി പരീക്ഷിക്കാവുന്ന ഈ ഒറ്റമൂലിക്ക് മുട്ട, ആര്യവേപ്പില, കഞ്ഞിവെള്ളം, നെല്ലിക്ക എന്നിവയാണ് ആവശ്യം. ഇത് നാലും കൂടി ചേർത്ത് മിക്സിയിൽ നന്നായി അടിച്ചെടുക്കുക. തലേദിവസത്തെ കഞ്ഞിവെള്ളം ഉപയോഗിക്കുന്നതാണ് കുറച്ചുകൂടി നല്ലത്. കഞ്ഞിവെള്ളം ഇഷ്ടമില്ലാത്തവർക്ക് തൈര് ഉപയോഗിക്കാവുന്നതാണ്. മിക്സിയിൽ അടിച്ചെടുത്ത മിശ്രിതം മുടിയിഴകളിൽ നന്നായി തേച്ചുപിടിപ്പിച്ച് അര മണിക്കൂറിന് ശേഷം കഴുകി കളയാണം.
ഇത് മൂന്ന്, നാല് ദിവസത്തിനിടെ ഒരു തവണ ചെയ്യാവുന്നതാണ്. താരൻ അകറ്റാൻ മാത്രമല്ല, മുടിയുടെ ആരോഗ്യത്തിനും മുടി തഴച്ചു വളരുന്നതിനും സഹായിക്കും. മുടി പൊട്ടുന്നതിനും മുടിക്ക് കറുപ്പുണ്ടാകുന്നതിനും ഇവ ഉത്തമ പ്രതിവിധിയാണ്.
മുട്ടയിൽ അടങ്ങിയിരിക്കുന്ന പ്രോട്ടീൻ മുടിയ്ക്ക് നല്ല ബലം കൊടുക്കും. മുടി വളരാനും മുടിയുടെ ആരോഗ്യത്തിനും നല്ലതാണ് ആര്യവേപ്പില. ഈ ഹെയർപാക്ക് പരീക്ഷിക്കുന്നതിന് മുമ്പായി മുടിയിൽ നന്നായി എണ്ണ തേയ്ക്കാൻ പ്രത്യേകം ശ്രദ്ധിക്കണം.
