ചെന്നൈ: രജനികാന്തിനെയും ശിവകാർത്തികേയനെയും സന്ദർശിച്ച് ചെസ് ചാമ്പ്യൻ ഡി ഗുകേഷ് ദൊമ്മരാജു. ഭാരതത്തിന്റെ അഭിമാനമായി മാറിയ ഗുകേഷിന് ഇരുവരും സമ്മാനവും നൽകി. ആഡംബര വാച്ചുകളാണ് സമ്മാനമായി താരങ്ങൾ നൽകിയത്.
രജനികാന്തിനെയും ശിവകാർത്തികേയനെയും സന്ദർശിച്ചതിന്റെ ചിത്രങ്ങൾ ഗുകേഷ് എക്സിൽ പങ്കുവച്ചു. തിരക്കിനിടയിലും തനിക്ക് വേണ്ടി സമയം മാറ്റിവച്ചതിനും ആശംസകൾ അറിയിച്ചതിനും നന്ദിയെന്ന അടിക്കുറിപ്പോടെയാണ് ഗുകേഷ് ചിത്രങ്ങൾ പങ്കുവച്ചത്.
മാതാപിതാക്കളോടൊപ്പമാണ് ഗുകേഷ് ചെന്നൈയിലെ രജനികാന്തിന്റെ വീട്ടിൽ എത്തിയത്. താരത്തിന്റെ പ്രത്യേക ക്ഷണപ്രകാരമാണ് ഗുകേഷും കുടുംബവും എത്തിയത്. ശിവകാർത്തികേയന്റെ ഓഫീസിലെത്തിയാണ് ഗുകേഷ് താരത്തെ കണ്ടത്.
ശിവകാർത്തികേയനെ കാണാൻ കഴിഞ്ഞതിന്റെ സന്തോഷവും ഗുകേഷ് പങ്കുവച്ചു. “എന്റെ പ്രിയപ്പെട്ട നടനാണ് ശിവകാർത്തികേയൻ. അദ്ദേഹത്തോടൊപ്പം സമയം ചെലവഴിക്കാൻ സാധിച്ചതിൽ വളരെയധികം സന്തോഷമുണ്ട്. ഈ നിമിഷം എനിക്ക് വളരെ സ്പെഷ്യലാണ്”- എന്നാണ് ഗുകേഷ് കുറിച്ചത്.
സിംഗപ്പൂരിൽ നടന്ന ലോകചെസ് ചാമ്പ്യൻഷിപ്പിൽ ചൈനയുടെ ഡിങ് ലിറനെ പരാജയപ്പെടുത്തിയാണ് ഗുകേഷ് ലോകചാമ്പ്യനായത്. ലോകചെസ് ചരിത്രത്തിലെ ഏറ്റവും പ്രായം കുറഞ്ഞ ചാമ്പ്യനെന്ന നേട്ടവും ഗുകേഷ് സ്വന്തമാക്കിയിരുന്നു.
