ചിരവയിൽ നിന്ന് ഷോക്കേറ്റ 35-കാരിക്ക് ദാരുണാന്ത്യം. തിരുനൽവേലി കളക്കാട്ടിൽ ഞായറാഴ്ച വൈകിട്ടായിരുന്നു വിചിത്രമായ സംഭവം. ദിനതന്തി പത്രമാണ് ഇക്കാര്യം റിപ്പോർട്ട് ചെയ്തത്. മാടത്തി എന്ന യുവതിയാണ് മരിച്ചത്. മാരിമുത്തു എന്ന ചെറുകിട ഹോട്ടൽ ഉടമയാണ് 35കാരിയുടെ ഭർത്താവ്.
ഇവരുടെ ഹോട്ടൽ ആവശ്യങ്ങൾക്കായി തേങ്ങ ചിരകുന്നതിനിടെയാണ് അപകടം. വൈദ്യുതിയിൽ പ്രവർത്തിക്കുന്ന ചിരവയാണ് ഇവർ ഉപയോഗിച്ചിരുന്നത്. ചമ്മന്തിക്കായി തേങ്ങ ചിരകുന്നതിനിടെയാണ് അപ്രതീക്ഷിത അപകടമുണ്ടായത്. തത്ക്ഷണം യുവതി മരിച്ചെന്നാണ് സൂചന. യുവതിയുടെ മൃതദേഹം തിരുനെൽവേലി മെഡിക്കൽ കോളജിലേക്ക് പോസ്റ്റുമോർട്ടത്തിനായി കൊണ്ടുപോയി.
സംഭവത്തിൽ 35കാരിയുടെ ഭർത്താവിന്റെ പരാതിയിൽ കളക്കാട് പൊലീസ് അസ്വഭാവിക മരണത്തിന് കേസ് എടുത്ത് അന്വേഷണം ആരംഭിച്ചിട്ടുണ്ട്. ഇവർക്ക് രണ്ടുകുട്ടികളാണ്. പ്രദേശവാസികൾ സംഭവത്തിന്റെ ഞെട്ടലിലാണ്.
