തിരുവനന്തപുരം: പ്രമുഖ വിദ്യാഭ്യാസ വിദഗ്ധനും പ്രഭാഷകനുമായ ഡോ. അനിൽ സഹസ്രബുദ്ധേ ഇന്ന് തിരുവനന്തപുരത്ത് എത്തുന്നു. വൈകിട്ട് 5 മണിക്ക് ശ്രീമൂലം ക്ലബിൽ “വിദ്യയിൽ നിന്ന് വിജ്ഞാനത്തിലേയ്‌ക്ക്” എന്ന വിഷയത്തിൽ അദ്ദേഹം പ്രഭാഷണം നടത്തും. അഖില ഭാരതീയ രാഷ്‌ട്രീയ ശിക്ഷക് മഹാസംഘിന്റെ നേതൃത്വത്തിൽ നടക്കുന്ന പ്രഭാഷണ പരമ്പരയുടെ ഭാഗമായാണ് ഈ പരിപാടി സംഘടിപ്പിച്ചിരിക്കുന്നത്.
നാഷണൽ എജ്യുക്കേഷണൽ ടെക്‌നോളജി ഫോറത്തിന്റെ (NETF) അധ്യക്ഷനും നാഷണൽ അസസ്മെന്റ് ആൻഡ് അക്രഡിറ്റേഷൻ കൗൺസിൽ (NAAC), നാഷണൽ ബോർഡ് ഓഫ് അക്രഡിറ്റേഷൻ (NBA) എന്നിവയുടെ മുൻ അധ്യക്ഷനുമായ ഡോ. അനിൽ സഹസ്രബുദ്ധേ, വിദ്യാഭ്യാസ രംഗത്ത് വലിയ സംഭാവനകളാണ് നിർവഹിച്ചിട്ടുള്ളത്. ഡോ. സഹസ്രബുദ്ധേ കർണാടക സർവകലാശാലയുടെ കീഴിലുള്ള ബിവിബി കോളേജ് ഓഫ് എഞ്ചിനീയറിംഗ് ആൻഡ് ടെക്‌നോളജിയിൽ മെക്കാനിക്കൽ എഞ്ചിനീയറിംഗ് ബിരുദം നേടിയ സ്വർണ്ണ മെഡൽ ജേതാവാണ്. ബാംഗ്ലൂർ ഐഐഎസ്സിൽ നിന്ന് ബിരുദാനന്തര ബിരുദവും ഡോക്ടറേറ്റും നേടിയ അദ്ദേഹത്തിന് നിരവധി പേര്‍ക്ക് മാതൃകയാകാൻ കഴിഞ്ഞിട്ടുണ്ട്.
1995-ൽ ഐഐടി ഗുവാഹത്തിയിൽ ഫാക്കൽറ്റി അംഗമായി ചേർന്ന അദ്ദേഹം, വിവിധ അക്കാദമിക് ഉത്തരവാദിത്വങ്ങൾ വഹിച്ചിട്ടുണ്ട്. 2005 മുതൽ 2015 വരെ പൂനെയിലെ കോളേജ് ഓഫ് എൻജിനീയറിംഗ് (COEP) ഡയറക്ടറായും പിന്നീട് എഐസിടിഇ ചെയർമാനായും അദ്ദേഹം ശ്രദ്ധേയമായ പ്രവർത്തനങ്ങൾ നടത്തി.
ഡോ. അനിൽ സഹസ്രബുദ്ധെയുടെ പ്രഭാഷണം വിദ്യാഭ്യാസ മേഖലയിലെ പുതിയ മാറ്റങ്ങൾക്കുള്ള വഴികാട്ടിയാകുമെന്നാണ് പ്രതീക്ഷ.
