ഇടുക്കി: കാട്ടാന ആക്രമണത്തിൽ യുവാവ് മരിച്ചു. ഇടുക്കി മറയൂർ ചമ്പക്കാട്ടിലാണ് സംഭവം. വനവാസി യുവാവായ വിമലാണ് (57) മരിച്ചത്. ചിന്നാർ വന്യജീവി സങ്കേതത്തിന് അകത്താണ് ആക്രമണമുണ്ടായത്. ഫയർ ലൈൻ ഇടാൻ പോകുന്നതിനിടെയാണ് വിമലിനെ കാട്ടാന ആക്രമിച്ചത്.
വിമലിനൊപ്പം രണ്ട് സ്ത്രീകൾ ഉൾപ്പെടെ എട്ട് പേർ ഉണ്ടായിരുന്നതായാണ് ലഭിക്കുന്ന വിവരം. ഒമ്പതംഗ സംഘമാണ് ഫയർലൈൻ ഇടാനായി കാട്ടിലേക്ക് പോയത്. ഇവരുടെ മുന്നിലേക്ക് അപ്രതീക്ഷിതമായി കാട്ടാന പാഞ്ഞെത്തുകയായിരുന്നു. സംഘത്തിലുണ്ടായിരുന്നവർ ചിതറിയോടി. ഇതിനിടെയാണ് വിമലിനെ കാട്ടാന ആക്രമിച്ചത്.
ഇന്ന് രാവിലെയായിരുന്നു സംഭവം. ആക്രമണത്തിൽ ഗുരുതരമായി പരിക്കേറ്റ വിമലിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഘത്തിലുണ്ടായിരുന്ന മറ്റുള്ളവർ ഓടിരക്ഷപ്പെട്ടു.
