ഡെറാഡൂൺ: ആദി കൈലാസത്തിന്റെ പുണ്യയിടമായ പാർവതികുണ്ഡിൽ ദർശനം നടത്തി പ്രധാനമന്ത്രി നരേന്ദ്രമോദി. ഉത്തരാഖണ്ഡ് മുഖ്യമന്ത്രി പുഷ്കർ സിംഗ് ധാമിയോടൊപ്പമാണ് പ്രധാനമന്ത്രി പാർവതികുണ്ഡിലെത്തിയത്. പുണ്യയിടത്തിൽ പൂജ നടത്തുകയും പ്രാർത്ഥിക്കുകയും ചെയ്യുന്ന ചിത്രങ്ങൾ പ്രധാനമന്ത്രി എക്സിൽ പങ്കുവച്ചു.
ഉത്തരാഖണ്ഡിന്റെ സംസ്കാരം വിളിച്ചോതുന്ന സവിശേഷമായ വസ്ത്രം ധരിച്ചാണ് പ്രധാനമന്ത്രി പാർവതികുണ്ഡിൽ പൂജ നടത്തിയത്. പാർവതികുണ്ഡിൽ ദർശനം നടത്തിയ ശേഷം സംസ്ഥാനത്തെ പ്രധാന മലയാേര വിനോദസഞ്ചാര മേഖലയിലും അദ്ദേഹം സന്ദർശിച്ചു.
ഉത്തരാഖണ്ഡിലെ കുമയോൺ മേഖലയിലെ 5,338 അടി ഉയരത്തിൽ സ്ഥിതി ചെയ്യുന്ന തീർത്ഥാടന കേന്ദ്രമാണ് പാർവതികുണ്ഡ്. പരമശിവനും പാർവതിയും ധ്യാനിച്ച സ്ഥലമാണ് ഇവിടം എന്നാണ് വിശ്വസിക്കപ്പെടുന്നത്. എല്ലാ വർഷവും ആയിരക്കണക്കിന് ആളുകളാണ് ഇവിടെ പൂജ നടത്താൻ എത്തുന്നത്.
പ്രധാനമന്ത്രിയുടെ സന്ദർശനത്തോടനുബന്ധിച്ച് കനത്ത സുരക്ഷയാണ് പ്രദേശത്ത് ഒരുക്കിയിരിക്കുന്നത്. ഉച്ചയോടെ അൽമോറ ജഗേശ്വർ ധാമിൽ അദ്ദേഹം ദർശനം നടത്തും. സംസ്ഥാനത്ത് വിവിധ വികസനങ്ങൾ പ്രധാനമന്ത്രി ഉദ്ഘാടനം ചെയ്യും.
ഗ്രാമവികസനം, റോഡ്, വൈദ്യുതി, ജലസേചനം, കുടിവെള്ളം, വിദ്യാഭ്യാസം, ആരോഗ്യം, ദുരന്തനിവാരണം തുടങ്ങിയ മേഖലകളിലായി ഏകദേശം 4,200 കോടി രൂപയുടെ ഒന്നിലധികം വികസന പദ്ധതികളാണ് പ്രധാനമന്ത്രി രാജ്യത്തിന് സമർപ്പിക്കുന്നത്.
