കോഴിമുട്ട കഴിക്കാത്തവർ വിരളമാണ്. മാംസാഹാരപ്രേമികൾ മാത്രമല്ല, ചില സസ്യാഹാരികൾ പോലും കോഴിമുട്ട കഴിക്കാറുണ്ട്. പ്രോട്ടീനാൽ സമ്പന്നമായ മുട്ട ദിവസവും കഴിക്കുന്നത് നല്ലതായതിനാൽ ഏവർക്കും പ്രിയങ്കരമാണിത്. എന്നാൽ മുട്ടയുടെ വില റോക്കറ്റ് പോലെ കുതിച്ചുയർന്നാൽ നാമെന്ത് ചെയ്യും. ഇപ്പോൾ 6 രൂപ മുതൽ 8 രൂപ വരെയാണ് കേരളത്തിലെ പലയിടങ്ങളിലും മുട്ടവില. എന്നാൽ ഒരു ഡസൻ മുട്ടയ്ക്ക് അഞ്ഞൂറ് രൂപ കൊടുക്കേണ്ടി വന്നാലോ? വാടകക്കോഴിയെ വാങ്ങേണ്ടി വരും അല്ലേ..? അതുതന്നെയാണ് അമേരിക്കയിലും സംഭവിച്ചത്..
പക്ഷിപ്പനി വ്യാപകമായതോടെ ലക്ഷക്കണക്കിന് കോഴികളെ രാജ്യത്ത് കൊന്നൊടുക്കേണ്ടി വന്നിരുന്നു. ഇതോടെ മുട്ടയ്ക്ക് കടുത്ത ക്ഷാമം അനുഭവപ്പെട്ടു. മുട്ടവില റോക്കറ്റ് പോലെ കുതിച്ചുയരുകയും ചെയ്തു. യുഎസിലെ ചില ഭാഗങ്ങളിൽ ഒരു ഡസന് 14 ഡോളർ (1,219 ഇന്ത്യൻ രൂപ) വരെ കൊടുത്താലെ മുട്ട കിട്ടൂവെന്ന അവസ്ഥയും സംജാതമായി.
കോഴിമുട്ടയ്ക്ക് പൊന്നുംവിലയായതോടെ കോഴികളെ വളർത്താൻ തീരുമാനിക്കുകയായിരുന്നു പലരും. ഇതാകുമ്പോൾ കീശകീറാതെ മുട്ട കഴിക്കാമല്ലോ.. ഈ സാഹചര്യത്തിൽ ശരിക്കും കോളടിച്ചത് മുട്ടക്കോഴികളെ വളർത്തുന്നവരായിരുന്നു. ‘റെന്റ് എ ചിക്കൻ’ എന്ന രീതിയിൽ സംരംഭ സാധ്യതകൾ പൊട്ടിമുളച്ചു. ആളുകൾ മുട്ട വാങ്ങുന്നതിന് പകരം മുട്ടക്കോഴികളെ വാടകയ്ക്ക് എടുക്കാൻ തുടങ്ങി. പ്രതിവർഷം ആയിരക്കണക്കിന് ഡോളർ തുക മുട്ട വാങ്ങുന്നതിന് മാത്രം ചെലവാക്കേണ്ട അവസ്ഥയെ മറികടക്കാൻ 600 ഡോളർ കൊടുത്ത് ആറ് മാസത്തേക്ക് മുട്ടക്കോഴികളെ വാടകയ്ക്കെടുക്കുന്നതായി രീതി.
ആറ് മാസത്തേക്ക് 2 മുതൽ നാല് മുട്ടക്കോഴികളെ വരെ ഇത്തരത്തിൽ വാടകയ്ക്ക് ലഭിക്കും. ഒരു വർഷം വരെ ഇവയെ ഉപയോഗിക്കാനുള്ള അവസരവും, മുട്ടക്കോഴിയെ അത്രയ്ക്ക് ഇഷ്ടപ്പെട്ടാൽ സ്വന്തക്കാനുള്ള ഓഫറും കമ്പനികൾ നൽകുന്നുണ്ട്.
2022ൽ പക്ഷിപ്പനി റിപ്പോർട്ട് ചെയ്തത് മുതൽ 166 മില്യൺ കോഴികളെയാണ് അമേരിക്കയിൽ കൊന്നൊടുക്കിയത്. ആ സമയത്ത് ഒരു ഡസൻ മുട്ടയുടെ വില 1.93 ഡോളറായിരുന്നു. എന്നാൽ 2023 ജനുവരി ആയപ്പോഴേക്കും ഇരട്ടിയായി 4.82 ഡോളർ എന്ന നിലയിലെത്തി. ഇപ്പോൾ റീട്ടെയിൽ മാർക്കറ്റുകളിൽ 4.95 ഡോളറാണ്. എന്നാൽ ചിക്കാഗോ, ന്യൂയോർക്ക്, സാൻ ഫ്രാൻസിസ്കോ പോലുള്ള നഗരങ്ങളിലാകട്ടെ മുട്ടവില 10 ഡോളറായി (870 ഇന്ത്യൻ രൂപ). ഇതോടെയാണ് വാടകക്കോഴികൾ കൂടുതൽ ജനപ്രിയമായത്.
മുട്ടക്കോഴിയെ വിതരണം ചെയ്യുന്നവർ തന്നെ അവയെ എങ്ങനെ പരിപാലിക്കണമെന്ന നിർദേശവും നൽകും. ബുക്ക്, ട്യൂട്ടോറിയൽ, തീറ്റ, എന്നിവയും ഫോൺസർവീസും കമ്പനികൾ നൽകുന്നു. ആരോഗ്യമുള്ള മുട്ടക്കോഴി ആഴ്ചയിൽ അഞ്ച് മുട്ട വരെ തരുമെന്നും കമ്പനികൾ അവകാശപ്പെടുന്നു.
