മുംബൈ: ഓടുന്ന ട്രെയിനിൽ നിന്ന് ഇറങ്ങാൻ ശ്രമിക്കുന്നതിനിടെ തെറിച്ചുവീണ സ്ത്രീക്ക് രക്ഷകനായി റെയിൽവേ സുരക്ഷാ ഉദ്യോഗസ്ഥൻ. മഹാരാഷ്ട്രയിലെ ബോറിവാലി റെയിൽവേ സ്റ്റേഷനിലാണ് സംഭവം. ഇതിന്റെ സിസിടിവി ദൃശ്യങ്ങൾ റെയിൽവേയുടെ ഔദ്യോഗിക എക്സ് അക്കൗണ്ടിൽ പോസ്റ്റ് ചെയ്തിട്ടുണ്ട്. ഇത്തരം അപകടങ്ങൾ ആവർത്തിക്കുന്നതിന്റെ പശ്ചാത്തലത്തിൽ യാത്രക്കാർക്ക് കർശന മുന്നറിയിപ്പും റെയിൽവേ നൽകി.
ഓടുന്ന ട്രെയിനിൽ കയറാനോ ഇറങ്ങാനോ ശ്രമിക്കരുതെന്ന് വീഡിയോ പങ്കുവച്ചുകൊണ്ട് റെയിൽവേ അറിയിച്ചു. ട്രെയിൻ സ്റ്റേഷനിൽ നിർത്താൻ തുടങ്ങുന്നതിനിടെയാണ് യുവതി ട്രെയിനിൽ നിന്ന് ഇറങ്ങാൻ ശ്രമിച്ചത്. ബാലൻസ് തെറ്റിയ സ്ത്രീ പ്ലാറ്റ്ഫോമിലേക്ക് തെറിച്ചുവീഴുകയായിരുന്നു. തുടർന്ന് ട്രാക്കിലേക്ക് തെന്നിമാറുന്നതിനിടെ ആർപിഎഫ് ഉദ്യോഗസ്ഥൻ പാഞ്ഞെത്തി യുവതിയെ പിടിച്ചുമാറ്റി. സുരക്ഷാ ഉദ്യോഗസ്ഥന്റെ സമയോചിതമായി ഇടപെടലിലൂടെയാണ് യുവതിക്ക് ജീവൻ തിരികെ ലഭിച്ചത്.
महाराष्ट्र के बोरीवली रेलवे स्टेशन पर एक महिला चलती ट्रेन से उतरते समय असंतुलित होकर गिर पड़ी। वहां मौजूद रेलवे सुरक्षाकर्मी ने तत्परता दिखाते हुए उसे बचा लिया।
कृपया चलती ट्रेन से चढ़ने या उतरने की कोशिश न करें।#MissionJeevanRaksha pic.twitter.com/6R8FALdD0d
— Ministry of Railways (@RailMinIndia) March 9, 2025
സംഭവത്തിന് പിന്നാലെ, യാത്രക്കാരിക്കെതിരെ പിഴ ചുമത്തണമെന്നും ഇത്തരം സംഭവങ്ങൾ ഉണ്ടാകാതിരിക്കാൻ കൃത്യമായ നടപടികൾ സ്വീകരിക്കണമെന്നും സഹയാത്രികർ പ്രതികരിച്ചു. സോഷ്യൽമീഡിയയിലും ഇതേ അഭിപ്രായങ്ങളാണ് ആളുകൾ ഉന്നയിക്കുന്നത്.
കഴിഞ്ഞ ദിവസവും മഹാരാഷ്ട്രയിൽ സമാനമായ സംഭവം റിപ്പോർട്ട് ചെയ്തിരുന്നു. ബദ്ലാപൂർ റെയിൽവേ സ്റ്റേഷനിൽ ലോക്കൽ ട്രെയിനിൽ കയറാൻ ശ്രമിക്കുന്നതിനിടെ യുവതിക്ക് ഗുരുതരമായി പരിക്കേറ്റു. തിരക്കിനെ തുടർന്ന് ട്രാക്കിലേക്ക് തെറിച്ചുവീണ യുവതിയുടെ തലയ്ക്ക് ഗുരുതരമായി പരിക്കേൽക്കുകയായിരുന്നു.
