മംഗളൂരു: മംഗളൂരുവിൽ ബജ്റംഗ്ദൾ പ്രവർത്തകനെ വെട്ടിക്കൊന്നു. ബജ്റംഗ്ദൾ പ്രവർത്തകനായ സുഹാസ് ഷെട്ടി ആണ് കൊല്ലപ്പെട്ടത്. രാത്രി 8.27 ഓടെ മംഗളൂരുവിന്റെ പ്രാന്തപ്രദേശത്തുള്ള ബജ്പെ പോലീസ് സ്റ്റേഷൻ പരിധിയിലെ കിന്നിപദാവിൽ വെച്ചാണ് സുഹാസ് ഷെട്ടിയെ ക്രൂരമായി വെട്ടിക്കൊലപ്പെടുത്തിയത്. സുഹൃത്തുക്കൾക്കൊപ്പം കാറിൽ സഞ്ചരിക്കുകയായിരുന്ന സുഹാസ് ഷെട്ടിയെ സ്വിഫ്റ്റ് കാറിലും പിക്കപ്പ് വാഹനത്തിലും പിന്തുടർന്നെത്തിയ സംഘം തടഞ്ഞു നിർത്തി വെട്ടുകയായിരുന്നു. അഞ്ച് പേരടങ്ങുന്ന സംഘമാണ് മാരകായുധങ്ങളുമായി ആക്രമിച്ചത്. ഉടൻ തന്നെ തൊട്ടടുത്ത എ.ജെ ഹോസ്പിറ്റലിൽ എത്തിച്ചെങ്കിലും രക്ഷിക്കാനായില്ല.
സഞ്ജയ്, പ്രാജ്വൽ, അൻവിത്, ലതീഷ്, ശശാങ്ക് എന്നീ സുഹൃത്തുക്കൾക്കൊപ്പമായിരുന്നു സുഹായ് യാത്ര ചെയ്തത്. കൊടുവാൾ ഉപയോഗിച്ച് മാരകമായി പലതവണ വെട്ടിയാണ് കൊലപ്പെടുത്തിയത്. അക്രമണത്തിന്റെ ദൃശ്യങ്ങൾ പുറത്ത് വന്നു. ബാജ്പെ പോലീസ് കേസ് രജിസ്റ്റർ ചെയ്തു.
2022-ൽ സൂറത്ത്കലിൽ നടന്ന ഫാസിൽ കൊലക്കേസിലെ മുഖ്യപ്രതിയാണ് സുഹാസ് ഷെട്ടി . ബാജ്പെ പോലീസ് സ്റ്റേഷൻ പരിധിയിലാണ് ഈ സംഭവം നടന്നത്. 2022 ജൂലൈ 28 ന് ഫാസിൽ കൊല്ലപ്പെട്ടത് യുവമോർച്ച നേതാവ് പ്രവീൺ നെട്ടാരുവിന്റെ കൊലപാതകത്തിനുള്ള മറുപടിയായിട്ടാണെന്നു പറയപ്പെടുന്നു.
സുഹാസിന്റെ കൊലപാതക വാർത്ത അറിഞ്ഞയുടൻ മംഗളൂരു സൗത്ത് ബിജെപി എംഎൽഎ വേദവ്യാസ കാമത്ത് മംഗളൂരുവിലെ എ.ജെ. ആശുപത്രിയിൽ എത്തി. ആശുപത്രിക്ക് മുന്നിൽ നിരവധി പ്രവർത്തകർ തടിച്ചുകൂടി. മുൻകരുതൽ നടപടിയായി ആശുപത്രിക്ക് മുന്നിൽ കർശനമായ പോലീസ് സന്നാഹം ഏർപ്പെടുത്തിയിട്ടുണ്ട്.
രാത്രി 8.27 ഓടെയാണ് സംഭവം നടന്നതെന്ന് മംഗളൂരു സിറ്റി പോലീസ് കമ്മീഷണർ അനുപം അഗർവാൾ പറഞ്ഞു. സഞ്ജയ്, പ്രജ്വാൾ, അൻവിത്, ലതീഷ്, ശശാങ്ക് എന്നിവർക്കൊപ്പം KA-12-MB-3731 എന്ന വാഹനത്തിൽ സഞ്ചരിക്കുകയായിരുന്ന സുഹാഷ് ഷെട്ടിയെ, ഒരു സ്വിഫ്റ്റ് കാറിലും പിക്കപ്പ് വാഹനത്തിലും സഞ്ചരിച്ചിരുന്ന ഒരു സംഘം അക്രമികൾ തടഞ്ഞുനിർത്തി. അഞ്ചോ ആറോ അക്രമികൾ സുഹാഷ് ഷെട്ടിയെ മാരകായുധങ്ങൾ ഉപയോഗിച്ച് ആക്രമിച്ചു, ഗുരുതരമായി പരിക്കേറ്റു. ഉടൻ തന്നെ എജെ ആശുപത്രിയിൽ എത്തിച്ചെങ്കിലും മരിച്ചു. ബാജ്പെ പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ടെന്നും പ്രതികളെ എത്രയും വേഗം അറസ്റ്റ് ചെയ്യാൻ നിരവധി ടീമുകൾ രൂപീകരിച്ചിട്ടുണ്ടെന്നും അദ്ദേഹം പറഞ്ഞു.
സുഹാസ് ഷെട്ടിയുടെ കൊലപാതകത്തെത്തുടർന്ന് മുൻകരുതൽ നടപടിയായി മംഗളൂരുവിലെ പല സ്ഥലങ്ങളിലും പോലീസ് പിക്കറ്റ് ഏർപ്പെടുത്തിയിട്ടുണ്ട്. സെൻസിറ്റീവ് പ്രദേശങ്ങളിൽ രാത്രിയും പകലും മുഴുവൻ പട്രോളിംഗ് നടത്താൻ നിർദ്ദേശം നൽകിയിട്ടുണ്ട്, കൂടുതൽ പോലീസിനെ മംഗളൂരു നഗരത്തിലേക്ക് വിന്യസിച്ചിട്ടുണ്ട്. കൊല്ലപ്പെട്ട സുഹാസിന് പ്രാദേശികമായി ധാരാളം പ്രവർത്തകരുടെ പിന്തുണ ഉണ്ടായിരുന്നു. അതുകൊണ്ട് തന്നെ പോലീസ് കനത്ത മുൻകരുതൽ നടപടികൾ സ്വീകരിച്ചിട്ടുണ്ട്.
സുഹാഷ് ഷെട്ടിയെ അക്രമികൾ മർദിച്ച് കൊലപ്പെടുത്തുന്ന സംഭവം ഒരു പ്രദേശവാസി തന്റെ മൊബൈൽ ഫോണിൽ പകർത്തിയിരുന്നു, ബിജെപി നേതാവ് സുനിൽ കുമാർ കാർകള തന്റെ എക്സ് അക്കൗണ്ടിൽ ഈ വീഡിയോ പങ്കിട്ടു.രാത്രിയോടെ ഈ വീഡിയോ വ്യാപകമായി പ്രചരിച്ചു.
