കൊച്ചി: മാറുന്ന ഫാഷൻ സങ്കൽപ്പങ്ങളുടെ പുതുമ സമ്മാനിച്ച് കൊച്ചിക്ക് ആഘോഷരാവൊരുക്കിയ ലുലു ഫാഷൻ വീക്കിന് സമാപനം. എട്ടാം പതിപ്പിന്റെ അവസാന ദിനം താരനിശയിലാണ് അരങ്ങേറിയത്. ഈ വർഷത്തെ ഫാഷൻ സ്റ്റൈൽ ഐക്കണായി നടി ഹണി റോസിനെ തിരഞ്ഞെടുത്തു. പ്രൈഡ് ഓഫ് കേരള പുരസ്കാരം മലയാളി ക്രിക്കറ്റ് താരവും രഞ്ജി ട്രോഫി ഫൈനലിൽ കേരളത്തിന്റെ ക്യാപ്റ്റനുമായിരുന്ന സച്ചിൻ ബേബിയും ഏറ്റുവാങ്ങി. ലുലു ഫാഷൻ വീക്ക് ബോൾഡ് ആൻഡ് ബ്യൂട്ടി പുരസ്കാരം പ്രയാഗ മാർട്ടിനും സമ്മാനിച്ചു. നടന് വിനയ് ഫോർട്ടാണ് പുരസ്കാരങ്ങൾ സമ്മാനിച്ചത്. പുരസ്കാര ജേതാക്കളായ താരങ്ങൾ റാംപിൽ ചുവടുവച്ചതോടെയാണ് ഫാഷൻ വീക്കിന് സമാപനമായത്. ലുലു ഫാഷൻ വേദിയിൽ നിന്ന് അവാർഡ് ഏറ്റുവാങ്ങാൻ കഴിഞ്ഞതിൽ സന്തോഷമെന്ന് ഹണി റോസ് പറഞ്ഞു. കേരളം എപ്പോഴും ചേർത്ത് നിർത്തിയിട്ടുള്ളിടമാണെന്നും കൊച്ചി എനിക്ക് ഏറെ പ്രിയപ്പെട്ടിടമാണെന്നും പുരസ്കാരം സ്വീകരിച്ച് സച്ചിൻ ബേബി പറഞ്ഞു.
ലുലു കൊച്ചി റീജണൽ ഡയറക്ടർ സാദിഖ് ഖാസിം, ലുലു ഇന്ത്യ മീഡിയ ഹെഡ് എൻ.ബി സ്വരാജ്, ലുലു ഹൈപ്പർമാർക്കറ്റ്സ് ഇന്ത്യ ജനറൽ മാനേജർ സുധീഷ് നായർ, ലുലു ഇന്ത്യ എച്ച്.ആർ ഹെഡ് അനൂപ് മജീദ്, കൊച്ചി ലുലുമാൾ ജനറൽ മാനേജർ വിഷ്ണു രഘുനാഥ്, കൊച്ചി ലുലു ഹൈപ്പർ മാർക്കറ്റ്സ് ജനറൽ മാനേജർ ജോ പൈനേടത്ത്, കാറ്റഗറി മാനേജർ ഷേമ സാറ, സെൻട്രൽ ബയ്യേഴ്സായ കെ.ആർ ജിനു, ടിനു ജെസി പോൾ തുടങ്ങിയവർ ചടങ്ങിന്റെ ഭാഗമായി. നാല് ദിവസങ്ങളിലായി 30 ലധികം ഷോകളാണ് ഫാഷൻ വീക്കിന്റെ ഭാഗമായത്. ലോകോത്തര ബ്രാൻഡുകൾക്ക് വേണ്ടി ഇന്ത്യയിലെ പ്രമുഖ മോഡലുകൾ അണിനിരന്നപ്പോൾ കുഞ്ചാക്കോ ബോബൻ, സണ്ണി വെയിൻ, വിനയ് ഫോർട്ട് , ആൻസൺ പോൾ, കൈലാഷ്, ബിബിൻ ജോർജ്, ഹേമന്ദ് മേനോൻ, റിയാസ് ഖാൻ, ധ്രുവൻ, മറീന മൈക്കിൾ കുരിശിങ്കൽ, സാധിക വേണുഗോപാൽ തുടങ്ങി സിനിമ മേഖലിയിൽ നിന്നുള്ള നിരവധി പേർ റാംപിൽ ചുവടുവച്ചത്. കൂടാതെ പ്രത്യേക ക്ഷണിതാക്കായി എത്തിയ താരങ്ങളും റാംപിൽ ചുവടുവച്ചു. പ്രശസ്ത സ്റ്റൈലിസ്റ്റായ മുംബൈയിൽ നിന്നുള്ള ഷൈ ലോബോയാണ് ലുലു ഫാഷൻ വീക്കിന്റെ ഷോ ഡയറക്ടർ. മോസ്റ്റ് പ്രിഫേർഡ് മെൻസ് വെയർ ബ്രാന്റിനുള്ള പുരസ്കാരം യു.എസ് പോളോയും, ആൺകുട്ടികളുടെ മോസ്റ്റ് പ്രിഫേഡ് കിഡ്സ് വെയർ ബ്രാൻഡ് പുരസ്കാരം റഫ്, മോസ്റ്റ് പ്രിഫേർഡ് മെൻസ് എത്തിനിക് ബ്രാൻഡ് പുരസ്കാരം അമുക്തിയും സ്വന്തമാക്കി. പുരുഷന്മാർ ഏറ്റവും കൂടുതൽ വിശ്വാസത്തിലെടുക്കുന്ന ബ്രാൻഡായി പീറ്റർ ഇംഗ്ലണ്ടും അവാർഡിന് അർഹത നേടി. മോസ്റ്റ് പ്രിഫേർഡ് ഫാഷൻ അക്സസറി ബ്രാൻഡായി കാപ്ലൈസ് പുരസ്കാരം ഏറ്റുവാങ്ങി.
