വയനാട്: വയനാട്ടിൽ യുവതിയെ കൊലപ്പെടുത്തിയ കേസിലെ പ്രതി ദിലീഷിനെതിരെ പോക്സോ കേസും ചുമത്തി. യുവതിയുടെ മൂത്ത പെൺകുട്ടിയെ പ്രതി ദിലീഷ് ലൈംഗികമായി പീഡിപ്പിച്ചെന്ന് പൊലീസ് കണ്ടെത്തി. ഈ കുട്ടിക്ക് 14 വയസ്സാണ് ഉള്ളത്. കൊലപാതകം, തട്ടിക്കൊണ്ടുപോകൽ വകുപ്പുകൾക്ക് പുറമേയാണ് ഇപ്പോൾ പോക്സോയും ചുമത്തിയത്.
വയനാട് തിരുനെല്ലി അപ്പപ്പാറയിലാണ് ആൺസുഹൃത്ത് യുവതിയെ കൊലപ്പെടുത്തിയത്. കൊല നടത്തിയതിന് പിന്നാലെ കാണാതായ യുവതിയുടെ ഇളയമകളെ 13 മണിക്കൂര്‍ നീണ്ട തിരച്ചിലിനൊടുവിൽ പ്രതിയോടൊപ്പം വീടിനടുത്ത തോട്ടത്തിൽ നിന്ന് പിന്നീട് കണ്ടെത്തിയിരുന്നു.
അമ്മയെ ദിലീഷ് കൊലപ്പെടുത്തുന്നതിനിടെ ഇവരുടെ മൂത്തമകള്‍ക്ക് പരിക്കേറ്റിരുന്നു. കുട്ടിയെ വിദഗ്ധ ചികിത്സക്കായി മെഡിക്കല്‍ കോളജിലേക്ക് മാറ്റിയപ്പോൾ വൈദ്യ പരിശോധനക്കിടെയാണ്‌ കുട്ടി പീഡിപ്പിക്കപ്പെട്ടതായി കണ്ടെത്തുന്നത്. ഇതേ തുടര്‍ന്നാണ് പ്രതിക്കെതിരെ പോക്സോ കേസെടുത്തത്.
