ബ്രഹ്മാണ്ഡ ചിത്രമായ കാട്ടാളൻ സിനിമയുടെ ചിത്രീകരണത്തിനിടെ ആന്റണി വർഗീസ് പെപ്പെയ്ക്ക് പരിക്ക്. ആനയുമായുള്ള ആക്ഷൻ രംഗം ചിത്രീകരിക്കുന്നതിനിടെയാണ് പരിക്കേറ്റതെന്നാണ് വിവരം. തായ്ലാൻഡിൽ വച്ചായിരുന്നു സംഭവം. അപകടത്തെ തുടർന്ന് കാട്ടാളന്റെ ഷൂട്ടിംഗ് മാറ്റിവച്ചു.
അന്താരാഷ്ട്ര ആക്ഷൻ ത്രില്ലറുകൾക്ക് സംഘട്ടനം ഒരുക്കുന്ന ലോകപ്രശസ്തനായ കെച്ച കെംബാക്ഡിയുടെയും ടീമിന്റെയും നേതൃത്വത്തിലാണ് ആക്ഷൻ രംഗങ്ങൾ ഒരുക്കുന്നത്. ഓങ് ബാക്ക് സീരിസിലൂടെ ജനശ്രദ്ധ നേടിയ പോങ് എന്ന ആനയും ചിത്രത്തിന്റെ ഭാഗമാകുന്നുണ്ട്.
മാർക്കോ എന്ന് മാസ് ആക്ഷൻ ചിത്രത്തിന് ശേഷം ഷെരീഫ് മുഹമ്മദ് നിർമിക്കുന്ന ചിത്രമാണ് കാട്ടാളൻ. നവാഗതനായ പോൾ ജോർജ് സംവിധാനം ചെയ്യുന്ന ചിത്രം പാൻ ഇന്ത്യൻ സിനിമയായാണ് തിയേറ്ററിലെത്തുന്നത്. വലിയ താരനിരയായിരിക്കും ചിത്രത്തിൽ അണിനിരക്കുക.
തെലുങ്കിലെ പ്രശസ്ത താരം സുനിൽ, മാർക്കോയിലൂടെ മലയാളത്തിലെത്തിയ കബീർദുഹാൻ സിംഗ്, റാപ്പർ ബേബി ജീൻ, തെലുങ്കു താരം രാജ് തിരാണ്ടുസു, ബോളിവുഡ് താരം പാർഥ് തിവാരി, ജഗദീഷ്, സിദ്ദിഖ് എന്നിവരും ചിത്രത്തിൽ പ്രധാന വേഷങ്ങൾ ചെയ്യുന്നു.
