ന്യൂഡൽഹി: പ്രമുഖ നടിമാരുടെ പേരിൽ വ്യാജ വോട്ടർ പട്ടിക പുറത്തുവന്നു. സമന്ത റൂത്ത് പ്രഭു, തമന്ന ഭാട്ടിയ, രാകുൽ പ്രീത് എന്നിവരുടെ പേരിലാണ് വ്യാജ വോട്ടർ പട്ടിക പുറത്തുവന്നത്. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചു. മധുരനഗർ പൊലീസാണ് കേസ് അന്വേഷിക്കുന്നത്. അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസർ സയ്യിദ് യഹിയ കമാൽ സമർപ്പിച്ച പരാതിയിലാണ് കേസെടുത്തിരിക്കുന്നത്.
വ്യാജമായി തയാറാക്കിയ ഇലക്ടറൽ ഫോട്ടോ ഐഡന്റിറ്റി കാർഡ് നമ്പറുകൾ ഉപയോഗിച്ചാണ് തിരിമറി നടത്തിയതെന്ന് പരാതിയിൽ പറയുന്നു. പൊതുജനങ്ങളെ തെറ്റിദ്ധരിപ്പിക്കുകയും വോട്ടർ പട്ടികയിലെ പ്രധാന വിവരങ്ങൾ ദുരുപയോഗം ചെയ്തതെന്നും അധികൃതർ പറഞ്ഞു.
സോഷ്യൽമീഡിയയിലൂടെയാണ് പോസ്റ്റ് പ്രചരിക്കുന്നത്. ഇതിന് പിന്നിൽ പ്രവർത്തിച്ചവരെ നിയമത്തിന് മുന്നിൽ കൊണ്ടുവരുമെന്നും കടുത്ത ശിക്ഷ നൽകുമെന്നും അന്വേഷണസംഘം അറിയിച്ചു. താരങ്ങളുടെ ചിത്രങ്ങളോടൊപ്പമാണ് വ്യാജ വിവരങ്ങൾ പ്രചരിപ്പിച്ചത്. വ്യാജ തെരഞ്ഞെടുപ്പ് നമ്പറുകളും ചിത്രങ്ങളുമാണ് പ്രതികൾ ഉപയോഗിച്ചിരിക്കുന്നത്. നിലവിൽ അന്വേഷണം കടുപ്പിച്ചിട്ടുണ്ട്.
