ആലപ്പുഴ: തദ്ദേശ തെരഞ്ഞെടുപ്പിൽ സീറ്റ് നിഷേധിക്കപ്പെട്ട ആലപ്പുഴ യൂത്ത് കോൺഗ്രസ് ജില്ലാ പ്രസിഡന്റ് പ്രവീൺ വൈകാരിക പോസ്റ്റുമായി രംഗത്ത് .പാർട്ടി നേതൃത്വം പ്രവീണിന് ജില്ലാ പഞ്ചായത്തിലേക്ക് സീറ്റ് നിഷേധിച്ചതിന് പിന്നാലെയാണ് ഫേസ്ബുക്കിലൂടെയുള്ള പ്രതികരണം.
പൊലീസിൽനിന്നും മർദനമേൽക്കുന്ന വീഡിയോ സഹിതമാണ് പ്രവീൺ കുറിപ്പ് പങ്കുവെച്ചത്.
“പൊലീസിൽ നിന്ന് കിട്ടിയ അടിയേക്കാൾ വേദന തോന്നുന്ന നീതിയില്ലാത്ത തീരുമാനം വരുമ്പോൾ, കോൺഗ്രസ്സ് പാർട്ടിക്ക് വേണ്ടി ജീവിതം ഉഴിഞ്ഞുവച്ച മത്സ്യതൊഴിലാളിയായ ഒരച്ഛനും മകനും തീർത്തും നിസ്സഹായരാണ്. കാലം സാക്ഷി, ചരിത്രം സാക്ഷി”, ഇതാണ് പ്രവീണിന്റെ കുറിപ്പ്.
അമ്പലപ്പുഴ സീറ്റ് ആയിരുന്നു പ്രവീണിന് നൽകാമെന്ന് ഏറ്റത് . വിഭജനം വന്നപ്പോൾ കെ സി വേണുഗോപാൽ വിഭാഗത്തുനിന്നുള്ള എ ആർ കണ്ണനാണ് സീറ്റ് ലഭിച്ചത്. ആലപ്പുഴ ജില്ലയിലെ കോൺഗ്രസ് സീറ്റ് ചർച്ചയിലെ പൊട്ടിത്തെറി വ്യാപകമാണ്. കെ സി വേണുഗോപാൽ – രമേശ് ചെന്നിത്തല ഗ്രൂപ്പുകൾക്കിടയിൽ അതൃപ്തി വ്യാപകമാണ്.
