തിരുവനന്തപുരം: പാർലമെന്റിൽ പ്രതിപക്ഷം ഉത്തരവാദിത്വത്തോടെ പെരുമാറണമെന്ന തന്റെ ലേഖനത്തിലെ പരാമർശത്തിൽ ഉറച്ച് ശശി തരൂർ എംപി.ജനങ്ങൾ തെരഞ്ഞെടുത്ത് പാർലമെന്റിൽ അയക്കുന്നത് നിലവിളിക്കാനോ ബഹളം വെക്കാനല്ല. രാജ്യത്തിനും ജനങ്ങൾക്കും വേണ്ടി സംസാരിക്കുകയാണ് തന്റെ ദൗത്യമെന്നും ശശി തരൂർ പറഞ്ഞു.
കഴിഞ്ഞ ദിവസം ഇംഗ്ലീഷ് മാദ്ധ്യമത്തിൽ എഴുതിയ ലേഖനത്തിൽ പാർലമെന്റിൽ പ്രതിപക്ഷം സ്വീകരിക്കുന്ന നിഷേധാത്മക നിലപാടിനെ തരൂർ രൂക്ഷമായി വിമർശിച്ചിരുന്നു. പാർലമെന്റ് നടപടികൾ തടസ്സപ്പെടുത്തുന്നതിനാണ് പ്രതിപക്ഷം പ്രാധാന്യം കൊടുക്കുന്നതെന്നും അദ്ദേഹം ചൂണ്ടിക്കാട്ടിയിരുന്നു.
പാർലമെന്റിനകത്ത് ചർച്ചകളിലൂടെ ഭരണപക്ഷത്തെ വെല്ലുവിളിക്കാനുള്ള അവസരങ്ങൾ ഉപയോഗിക്കാതെ, ബഹളമുണ്ടാക്കി ചർച്ചകളേയും സഭാനടപടികളും തടസപ്പെടുത്തുന്ന രീതിയാണ് പ്രതിപക്ഷം തുടരുന്നത്. ഇവിടെ പരാജയപ്പെടുന്നത് പ്രതിപക്ഷമാണെന്നും തരൂർ കുറ്റപ്പെടുത്തിയിരുന്നു.
