ന്യൂഡൽഹി: ഭാരതം ഒരു ഹിന്ദു രാഷ്ട്രമാണെന്നും അതിന് ഭരണഘടനയുടെ അംഗീകാരം ആവശ്യമില്ലെന്നും സർസംഘചാലക് മോഹൻ ഭാഗവത്. ഭാരതം ഹിന്ദുരാഷ്ട്രമാണെന്നത് സത്യമാണെന്നും രാജ്യത്തിന്റെ സാംസ്കാരിക പൈതൃകം ആളുകൾ ആഘോഷിക്കുന്നിടത്തോളം കാലം രാജ്യം ഒരു ഹിന്ദു രാഷ്ട്രമായി തുടരുമെന്നും മോഹൻ ഭാഗവത് പറഞ്ഞു. കൊൽക്കത്തയിൽ നടന്ന സമ്മേളനത്തിൽ സംസാരിക്കുകയായിരുന്നു അദ്ദേഹം.
ഹിന്ദുസ്ഥാൻ ഒരു ഹിന്ദുരാഷ്ട്രമാണ്. ഇന്ത്യയെ മാതൃരാജ്യമായി കരുതുന്നവർ ഇന്ത്യൻ സംസ്കാരത്തെ ആദരിക്കുന്നു. പൂർവികരുടെ മഹത്വത്തിൽ വിശ്വസിക്കുന്ന ആളുകൾ ഭാരതത്തിൽ ജീവിക്കുന്നിടത്തോളം കാലം ഇന്ത്യ ഒരു ഹിന്ദു രാഷ്ട്രമാണ്.
ആർഎസ്എസ് മുസ്ലീം വിരുദ്ധവികാരം പുലർത്തുന്ന സംഘടനയല്ലെന്നും മോഹൻ ഭാഗവത് പറഞ്ഞു. ആർഎസ്എസ് എല്ലായ്പ്പോഴും സുതാര്യതയോടെയാണ് പ്രവർത്തിച്ചിട്ടുള്ളതെന്നും ഇത് സംശയമുള്ള ആർക്ക് വേണമെങ്കിലും പരിശോധിക്കാമെന്നും അദ്ദേഹം വ്യക്തമാക്കി.
