ചെന്നൈ: സിറ്റിംഗ് ജഡ്ജി ജി.ആർ. സ്വാമിനാഥനെ അവഹേളിച്ചു കൊണ്ട് എഴുതിയ പുസ്തകം പിടിച്ചെടുക്കാൻ മദ്രാസ് ഹൈക്കോടതി ഉത്തരവിട്ടു.തിരുപ്പറംകുണ്ഡ്രം കുന്നിൽ കാർത്തിക ദീപം തെളിയിക്കാൻ ഹൈക്കോടതി ജഡ്ജി ജി.ആർ. സ്വാമിനാഥൻ ഉത്തരവിട്ടിരുന്നു. ഇതിനെത്തുടർന്ന്, കീഴൈകാട്രു പബ്ലിഷിംഗ് ഹൗസ് ചെന്നൈ പുസ്തകമേളയിൽ അദ്ദേഹത്തെ വിമർശിക്കുന്ന ഒരു പുസ്തകം പ്രകാശിപ്പിക്കാൻ പദ്ധതിയിട്ടു. ബിജെപി ഉൾപ്പെടെയുള്ള പാർട്ടികൾ ഈ നീക്കത്തെ ശക്തമായി എതിർത്തു. ഈ പുസ്തകം നിരോധിക്കണമെന്ന് ആവശ്യപ്പെട്ട് ജഗന്നാഥ് എന്ന അഭിഭാഷകൻ മദ്രാസ് ഹൈക്കോടതിയിൽ ഒരു ഹർജി ഫയൽ ചെയ്തിരുന്നു.
കേസ് ഇന്ന് രാവിലെ വാദം കേൾക്കാൻ വന്നപ്പോൾ, തമിഴ്നാട് സർക്കാരിന്റെ അറ്റോർണി ജനറലിനോടും കേന്ദ്ര സർക്കാരിന്റെ അഡീഷണൽ സോളിസിറ്റർ ജനറലിനോടും ഉച്ചയ്ക്ക് 2:15 ന് ഹാജരാകാൻ മദ്രാസ് ഹൈക്കോടതി ചീഫ് ജസ്റ്റിസ് ശ്രീവാസ്തവ ആവശ്യപ്പെട്ടു.
പുസ്തകത്തിന്റെ കോപ്പികൾ പിടിച്ചെടുക്കാനും പുസ്തകത്തിന്റെ പ്രസിദ്ധീകരണം നടക്കുന്നില്ലെന്ന് ഉറപ്പാക്കാനും കോടതി നിർദ്ദേശിച്ചിട്ടുണ്ട്. ചെന്നൈ പുസ്തക മേളയിലടക്കം ഇത് പ്രദർശിപ്പിക്കുകയോ വിൽക്കുകയോ ചെയ്യുന്നില്ലെന്ന് ഉറപ്പാക്കാനും കോടതി പൊലീസിന് നിർദേശം നൽകി. ഓൺലൈൻ വഴിപോലും പുസ്തകം പൊതുസമൂഹത്തിലേക്ക് എത്തുന്നില്ലെന്ന് ഉറപ്പാക്കണമെന്നും കോടതി നിർദേശിച്ചിട്ടുണ്ട്. പ്രസാധകനെതിരെ കോടതി സ്വമേധയാ കോടതിയലക്ഷ്യ നടപടികളും ആരംഭിച്ചു.
“ജസ്റ്റിസ് ജി.ആർ. സ്വാമിനാഥനെ വിമർശിക്കുന്നതും പ്രസിദ്ധീകരിക്കാൻ പോകുന്നതുമായ പുസ്തകം കണ്ടുകെട്ടണം. ചുമതലയുള്ള ജഡ്ജിയെ നിങ്ങൾക്ക് എങ്ങനെ വിമർശിക്കാൻ കഴിയും? പുസ്തകം ഒരു തരത്തിലും പ്രസിദ്ധീകരിക്കുന്നത് തടയാൻ നടപടിയെടുക്കണം. പുസ്തകത്തിൽ അപകീർത്തികരമായ വാക്കുകൾ മാത്രമല്ല, അസഭ്യവും ഉണ്ട്. ഒരു ബൗദ്ധിക വേദിയായ ഒരു പുസ്തകമേളയിൽ ഇത്തരം പ്രവൃത്തികൾ അനുവദിക്കാൻ കഴിയില്ല.”ചീഫ് ജസ്റ്റിസ് ഉത്തരവ് പുറപ്പെടുവിച്ചു, വിധിയിൽ ആർക്കെങ്കിലും പ്രശ്നം തോന്നിയാൽ അവർക്ക് അപ്പീൽ നൽകാം. എന്നും കോടതി പറഞ്ഞു
“ആ പ്രത്യേക പുസ്തകം നാളെ വിൽപ്പനയ്ക്ക് വയ്ക്കുന്നില്ലെന്ന് ഉറപ്പാക്കാൻ അടിയന്തര നടപടി സ്വീകരിക്കുമെന്ന്” തമിഴ്നാട് സർക്കാരിനുവേണ്ടി ഹാജരായ അഭിഭാഷകൻ പറഞ്ഞു.തമിഴ്നാട്ടിലെ വിവാദമായ തിരുപ്പറംകുണ്ഡ്രം കാർത്തിക ദീപം കേസിൽ ജസ്റ്റിസ് സ്വാമിനാഥൻ പുറപ്പെടുവിച്ച വിധിന്യായത്തെത്തുടർന്ന് സോഷ്യൽ മീഡിയയിൽ വ്യാപകമായി പ്രചരിച്ചിരുന്ന ലഘുലേഖ അഭിഭാഷകൻ കോടതിയിൽ സമർപ്പിച്ചു. കാക്കി ഹാഫ്-ട്രൗസർ ധരിച്ച്, കാവി പതാകയും ആചാര വിളക്കും പിടിച്ചുകൊണ്ടുള്ള ജസ്റ്റിസ് ജി.ആർ. സ്വാമിനാഥന്റെ കാരിക്കേച്ചറാണ് ലഘുലേഖയിലുള്ളത്. ഇതിൽ പുസ്തകത്തിന്റെ വിൽപന സംബന്ധിച്ച പരസ്യവും ഉണ്ടായിരുന്നു. ചെന്നൈ പുസ്തകമേളയിലടക്കം മുപ്പത് രൂപയ്ക്ക് പുസ്തകം ലഭിക്കുമെന്ന് വ്യക്തമാക്കുന്ന പരസ്യത്തിൽ പ്രസാധകന്റെ പേരും ഫോൺ നമ്പറും ഉണ്ടായിരുന്നു.
ലഘുലേഖ പരിശോധിച്ച കോടതി ഇത് സിറ്റിങ് ജഡ്ജിയെ അപകീർത്തിപ്പെടുത്തുന്നതാണെന്ന് വ്യക്തമാക്കി.പുസ്തകത്തിന്റെ ഉള്ളടക്കം അങ്ങേയറ്റം അപകീർത്തികരമാണെന്നും കോടതി നിരീക്ഷിച്ചു. ജഡ്ജിമാർക്കെതിരെ ഉപയോഗിക്കുന്ന ഭാഷ ഇതാണെങ്കിൽ ആളുകൾ ജുഡീഷ്യറിയെ എങ്ങനെ കാണുമെന്ന് കോടതി ചോദിച്ചു.
തമിഴ്നാട് മുഖ്യമന്ത്രി ഉദ്ഘാടനം ചെയ്യുന്ന വാർഷിക പരിപാടിയായ ചെന്നൈ പുസ്തകമേളയിലാണ് ഈ പുസ്തകം പ്രകാശനം ചെയ്യുന്നത്. ചെന്നൈ പുസ്തകമേളയുമായി ഈ പുസ്തകത്തിന് ബന്ധമില്ലെന്ന് സർക്കാർ കോടതിയെ അറിയിച്ചു. ജനുവരി 22 ന് കേസ് വീണ്ടും പരിഗണിക്കും.
