കൊല്ലം: സേവാഭാരതിയും കെ. ചിറ്റിലപ്പിള്ളി ഫൗണ്ടേഷനും ചേർന്ന് നടപ്പിലാക്കുന്ന “തലചായ്ക്കാനൊരിടം” പദ്ധതിയുടെ ഭാഗമായി കേരളത്തിൽ നിർമ്മിച്ച 79ാമത് വീടിന്റെ താക്കോൽദാനം നടന്നു. മയ്യനാട്, തട്ടാരയിൽ 13ാം വാർഡിൽ താമസിക്കുന്ന പ്രിയങ്കയ്ക്കും കുടുംബത്തിനുമായി നിർമ്മിച്ച വീടിന്റെ താക്കോൽദാനം രാഷ്ട്രീയ സ്വയംസേവക സംഘം ദക്ഷിണ കേരളം പ്രാന്ത പ്രചാരക് എസ് സുദർശൻ നിർവഹിച്ചു. സേവാഭാരതി മയ്യനാട് പ്രസിഡന്റ് സതീഷ്കുമാറാണ് ചടങ്ങിൽ അദ്ധ്യക്ഷത വഹിച്ചത്.
ത്യാഗവും സേവനവുമാണ് ഭാരതീയ സംസ്കാരത്തിന്റെ മുഖമുദ്രയെന്ന് അനുഗ്രഹ പ്രഭാഷണത്തിൽ സുദർശൻജി പറഞ്ഞു. ലോകം മുഴുവൻ ഒരു കുടുംബമാണെന്ന സങ്കൽപവും, കേവലമൊരു പ്രാവിനു വേണ്ടിപോലും ജീവിതം സമർപ്പിക്കാൻ തയ്യാറായ ശിബി ചക്രവർത്തിയുടെ മാതൃക ലോകത്ത് മറ്റൊരിടത്തും ദർശിക്കാൻ സാധിക്കാത്തതാണ്. അമ്മയെയും സഹോദരങ്ങളെയും പോലും തിരിച്ചറിയാതെ ദുഷ്പ്രവൃത്തികൾ ചെയ്യുന്ന ഈ ആപത് കാലത്ത് ഭാരതീയ മൂല്യങ്ങൾക്ക് അതിയായ പ്രാധാന്യമുണ്ടെന്ന് അദ്ദേഹം കൂട്ടിച്ചേർത്തു.
മയ്യനാട് ജന്മംകുളം ഭഗവതി ക്ഷേത്ര ഓഡിറ്റോറിയത്തിൽ വെച്ച് നടന്ന പരിപാടിയിൽ രാഷ്ട്രീയ, സാമൂഹിക സാസ്കാരിക സംഘടനാ പ്രതിനിധികൾ, ക്ഷേത്രഭാരവാഹികൾ എന്നിവർ പരിപാടിയിൽ സന്നിഹിതരായിരുന്നു.
